Komuniti di kandang menua pesisir diperansang meri kerejasama rat ngagai perintah - Berita Iban Online

Header Ads

  • Baru Nyadi

    Komuniti di kandang menua pesisir diperansang meri kerejasama rat ngagai perintah

    TEPA KENANG: Masir (tiga kanan) nerima tepa ari Biro Indu seraya dikemata Tuai Rumah Ajon (tiga kiba) sereta bala kaban JKKK ke bukai rambau atur program nya.
    Pekara tu ngambika perintah nadai napi pemar lebuh ti bejalaika projek pemansang kelebih agi di kandang menua pesisir.

    SRI AMAN: Komuniti menua pesisir di nengeri tu diperansang seruran meri kerejasama rat ngagai perintah dikena ngemuntangka agi perintah bejalaika bemacham projek pemansang ti pulaika pemaik begulai.

    Sapit Menteri Dalam Menua II, Datuk Masir Kujat madah enti nadai kerejasama rayat, perintah deka bejalaika pemansang lalu tu deka ngemai pengerugi ukai semina ngagai perintah aja, tang mega rayat.

    “Nyadi raban ti gawa, perintah meransang semua peranak kelebih agi di menua pesisir ngambi meri sukung nadai bebagi ngambika pemansang seruran bisi dipejalai di menua nya,” ku iya.

    Iya ke mega Kaban Parlimen (MP) Sri Aman mansutka jaku nya lebuh bejadika Program Pemesai Begulai Enggau Rayat di Rumah Ajon, Sapak Bubong, Pantu Sri Aman semak ditu.

    Ku iya, perintah seruran ngemeratka pemansang rayat nadai ngira sida diau di mengeri tauka menua pesisir ngambika tetiap iku sida bela ngasaika asil menua.

    “Perintah enda kala ngelaungka sekeda menua di nengeri tu lalu semua rayat, nadai ngira bansa, jalai pengarap enggau dini alai sida diau, deka ngasaika pemansang ti deka, benung enggau udah dipejalai pulaika pemaik begulai,” ku iya.

    Ku iya, sukung tegap ngagai tetiap iku pengari rayat di menua sida empu endang beguna endar ngemuntangka pejalai pemansang dia sereta ulih nyungkak ekonomi di menua nya.

    Ngelansa silik, Masir nyemetak madah, pematut komuniti menua pesisir ngubah chara berunding sida ke lama ti nekul sida ari ngaga ubah dikena ngangkatka tikas pengidup enggau ekonomi.

    “Gaya pengidup diatu chukup bebida enggau chara idup ke lama, nya kebuah sida patut berubah nyerumba pemansang kemaya hari ngambika sebaka enggau komuniti ti dulu agi nyapai arus pemansang,” ku iya seraya nambah, semua tu pulaika pengelantang diri enggau sida sebilik.

    Sama bisi datai bala ketuai opis perintah, ketuai raban bansa sereta peranak besemak ke bukai.

    Berebak enggau program nya, Masir mega bisi ngagihka belanja penyampau RM38,000 ngagai Komiti Pemansang Enggau Pengelikun Genturung Pendiau (JKKK) Rumah Ajon, Sapak dikena sida ngatur aktiviti sepanjai taun sida. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads