Header Ads

  • Berita Tebaru

    Komuniti pupu bansa di Long Lama agi ngemeranka adat ngelalu pengabang

    MANAH KAUL: Dennis (duduk, tengah) begulai enggau Kapitan Yeo Kee Siang di Long Lama disempulang sida sebilik, bala bakih enggau kaban belayan ke bukai. Gambar: #DennisNgau
    LONG LAMA, Baram: Taja jauh di menua ulu Baram diau begulai enggau komuniti Orang Ulu baka bansa Kayan, Kenyah enggau Penan, pasar menua pesisir Long Lama deka seruran idup tetiap kali pengerami Taun Baru China (TBC).

    Kaban Kunsil Nengeri (ADUN) Telang Usan, Dennis Ngau madahka adat ngelalu pengabang endang bisi diatur baka komuniti bukai lebuh ngerami jalai pengarap sida, baka Hari Krismas enggau Hari Raya, endang suah diatur ditu dikena ngelaluka penatai kaban belayan, bala bakih enggau bala pengabang ke bukai.

    Tu besai agi reti laban mayuh kaban belayan ari diri sebilik ti gawa enggau diau jauh ari mengeri enggau sida ke semak deka mulaika diri ke menua ngintu pengerami nya, ku iya.

    Ku Dennis, pengerami Taun Baru China seruran diintu nyelai agi di Long Lama laban pupu etnik enggau komuniti ke diau di pasar deka ngelimpangka awak diri ngabang ngagai komuniti China.

    “Komuniti Long Lama, taja datai ari sekeda etnik enggau bansa diau bebaik ngelama tu lalu pengerami jalai pengarap endang seruran nyadi pelasar dikena negutka pemanah tanggam kaul komuniti.

    “Betaun pengelama idup begulai enggau etnik bukai, komuniti China di Long Lama bisi kaul chukup manah enggau komuniti Orang Ulu ditu baka ti ulih dipeda sida landik bejaku ngena jaku menua tu kelebih agi jaku bansa Kayan enggau Kenyah, pekara nyelai komuniti China Long Lama,” ku Dennis.

    Dennis mansutka jaku tu ngagai The Borneo Post lebuhka ngabang ngagai rumah bala ketuai raban bansa China di Long Lama, Beluru enggau Lapok Penghulu Desmond Yap Cheng Siang sereta sekeda rumah ke bukai, ditu, apin lama ke udah.

    Taja pia ku Dennis nyematak madah, gaya ngintu pengerami kemaya hari bisi bebida dibanding enggau 20 taun tauka lebih, ke alai bansa China Long Lama beridup di mengeri nya empu dibanding diatu idup moden, ke alai rebak baru kereja enggau bedagang sereta gawa jauh ari pasar.

    “Pengawa berami enggau adat ngabang ngagai pangan diri nyadi sebagi ari pengawa ngintu nadai enti dipeda laban sekeda komuniti milih ngerami iya kediri enggau nerima pengabang di rumah sida, jauh ari Long Lama.

    “Taja pia, kitai seruran meransang bala komuniti mulaika diri ngagai Long Lama musim pengerami baka tu nentuka rebak baru deka ulih ngelala penatai asal sida enggau adat lama,” ku iya.

    Sama bisi datai Ketuai Nembiak PBB enggau Kaban Raban Nembiak PBB Sarawak, Kaunsilor Dominic Nyurang Ajang, SAO Edwin Jelenggai ari Pelilih Mit Long Bedian enggau Exco PBB Telang Usan, bala kaban Parti Demokratik Progresif (PDP) enggau Parti Sa’ati Rayat Sarawak (SUPP). #UtusanBorneo

    No comments

    Post Top Ad