KPDNKK Sarikei ngemunka Skim Rega Barang Dijaga Musim Pengerami TBC - Berita Iban Online

Header Ads

  • Baru Nyadi

    KPDNKK Sarikei ngemunka Skim Rega Barang Dijaga Musim Pengerami TBC

    ANANG BEAMBI ULIH: Skim Rega Barang Dijaga Musim Pengerami TBC Renggat Pelilih Sarikei udah dimunka di Pasar Central Sarikei, kemari.
    SARIKEI: Nyerumba pengerami ngintu Taun Baru China (TBC) ti deka datai enda lama agi, Opis Menteri Dagang Dalam Menua, Koperasi enggau Orang Bebelika Barang (KPDNKK) Pampang Sarikei udah ngelancharka Skim Rega Barang Dijaga Musim Pengerami TBC.

    Ketuai Pampang KPDNKK Sarikei, Jenny Teron madahka, skim nya deka diterit pengelama 12 hari, berengkah ari 10 Februari (Hari Enam) nyentuk 21  Februari (Hari Tiga) tu ila.

    “Bisi 13 bengkah barang ti dijaga rega udah dilis dalam skim tu.

    “Entara barang ti dipasuk dalam skim tu, ba kategori rega renchit ungkup taun tu iya nya manuk idup (RM7.80/ sekilogram (kg) ), manuk standard (RM9.00/kg), manuk super (RM9.50/kg), telu manuk gred A (RM0.39 sigi), telu manuk gred B (RM0.38 sigi), telu manuk gred C (RM0.37 sigi), kubis bulat import (RM4/kg), bawang putih China (RM10.00/kg), ikan bawal putih (RM38/kg), udang putih besai(RM35/kg), perut jani  (RM19.50/kg) , dagin jani (RM18.50/kg) enggau jani idup (dijaga ba renggat ladang aja).

    “Semua barang ti dijaga rega tu ungkup kandang menua Sarikei, Julau, Pakan enggau Meradong,” ku iya.

    Iya mansutka jaku nya rambau Pengawa Bejadika Skim Rega Barang Dijaga Musim Pengerami TBC Renggat Pelilih Sarikei di Pasar Central Sarikei, kemari.

    Sama bisi datai Residen Bgi Menua Sarikei, Mohamad Junaidi Mohidin.

    Nya alai, berindik ari pengawa neritka Skim Rega Barang Dijaga Musim Pengerami TBC tu ku Jenny, semua pedaga dilalau ngengkahka tanda rega chura kalas ba barang dilis dalam skim nya.

    “Atur terit deka dipejalai di baruh Akta Kawalan Harga dan Anti Pencatutan 2011 (AKHAP 2011) ngagai sebarang pedagang ti enda nitihka atur pekara nya.

    “Ba lansa ke bukai, ngagai bala pengguna ke bisi penerang tauka bisi sebana, tau telefon ngagai KPDNKK Sarikei ba lumur 084 657751 (bilik gerakan) tauka nganjung ngagai email ke e-aduan@kpdnkk.gov.my”  ku Jenny madah nyemetak. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads