Header Ads

  • Berita Tebaru

    KWKPK deka mutar semilan kes besai di nengeri tu

    Menteri KWKPK Dato Sri Fatimah Abdullah
    KUCHING: Opis Menteri Pengintu Pengelantang, Komuniti, Orang Indu, Ruang Bilik enggau Pemansang Nembiak (KWKPK) beratka pengawa mutarka semilan kes besai di nengeri tu.

    Menteri KWKPK Dato Sri Fatimah Abdullah madah, semilan kes nya dikelala asil pansik enggau perati begulai enggau kaling strategik ba renggat nengeri.

    “Pansik enggau perati tu mega dipejalai nengah kerejasama ba renggat pelilih menua enggau pelilih mit,” ku iya ba jaku pengelalu ba ‘Program Hari Terbuka KWKPK’ ke diatur di Waterfront Kuching ditu, kemari.

    Hari begulai enggau mensia mayuh ke diatur dua hari berunggu berengkah 3 ngagai 4 Februari dipenyadi Kepala Menteri Datuk Patinggi Abang Johari Tun Openg.

    Semilan kes besai nitihka penerang Fatimah iya nya, ke satu, salahguna dadah, kedua SI enggau HIV, ketiga kes nembiak ngandung, keempat kes belaki bebini sereta sarak, kelima kes pengawa jai seksual ba nembiak enggau orang indu.

    Iya nandu, keenam kes ti nadai meruan endur diau (ngampar), ketujuh kes bejamah dalam ruang bilik, kelapan kes pengawa jai ba reta tengkira enggau kesemilan kes pemar nadai surat penerang diri (kad pengelala).

    “Ambika chunto, KWKPK netapka tagit ulih ngurangka kes nembiak ngandung ngagai 10 peratus ari taun ke udah kenyau 2015.

    “Kes nembiak ngandung udah nurun kenyau 2015, iya nya ngelui 10 peratus tetiap taun.

    “Naka bulan Disember 2017, penyampau 2,185 kes nembiak ngandung dirikod di klinik enggau sepital enti dibandingka enggau 3,396 kes ba taun 2014,” ku Fatimah.

    Ngenang kaul ke sama, iya mega madah KWKPK keran mantu orang nerima bantu ninting bulan ari Opis Pengintu Pengelantang Pendiau Sarawak (JKNS) nengah Program ‘Usahawan Mikro’.

    Ku iya latih enggau puku disedia ngagai sida ngambi ulih ngidupka diri jemah.

    “Kenyauari taun 2013, sepenyampau 207 tauka 10.9 peratus ari 1,889 iku pesereta udah mujur ngidupka diri nengah penatai pemisi entara RM1,000 nyentuk RM13,000 sebulan.

    “Ketegal nya sida udah enda nerima bantu ninting bulan ari JKMS agi,” ku Fatimah nandu. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: