‘Mama Care’ ngangkatka pengawa tradisional ngintu orang beranak - Berita Iban Online

Header Ads

  • Baru Nyadi

    ‘Mama Care’ ngangkatka pengawa tradisional ngintu orang beranak

    DIKENA NGENEGAPKA ORANG INDU: Rohani (duduk tengah) begambar enggau Jacqueline David (duduk tiga kiba), ke nguluka raban pengarang berita ngagai Putrajaya/Kuala Lumpur bedau lama tu tadi.
    KUALA LUMPUR: Program ‘Mama Care’ ti dikemansangka Opis Menteri Orang Indu, Ruang Bilik enggau Pemansang Komuniti (KWKPM) iya nya siti program ke digaga ungkup ngemeranka pengawa bidan ngintu orang beranak, ngambika pengawa kelia enda punas diserunyut jeman.

    Menteri KWKPM Dato Sri Rohani Abdul Karim madah ‘Mama Care’ ditumbuh ngambika ulih meri penatai pemisi ngagai orang indu ke gawa ba palan lebuh ke ngintu indai ti udah beranak sereta anak mit nya dalam kandang 44 hari.

    “Pengawa orang indu ba ‘Mama Care’, iya nya ngintu raban indai ke baru udah beranak sereta ngibun anak mit nya dalam kandang 44 hari dalam pantang.

    “Pemisi ke di ulih sida chukup besai, nya alai orang indu ke bisi peneleba, nyema sida ngintu orang beranak digaji RM100 sehari. Enti 44 hari, ulih nyapai urung RM4,400 sebulan.

    “Besai agi penguntung enti servis sida iya diguna datai ngagai menua luar, laban pakej nya deka dibayar sekali enggau tambang bilun sereta endur diau enggau pemakai,” ku Rohani.

    Iya madah munyi nya lebuh dikerandau pengarang berita maya nerima penatai Gerempung Pemberita Pelilih Mengeri Kuching (KDJA) enggau Kelab Pengarang Berita Nasional (NPC) di Restoran Rebung bedau lama ke udah.

    Iya nandu baru madahka tu entara pengawa tradisional, ke dikemeran sida ke tuai ti nyadi bidan kelia, lalu diatu pengawa tu nyauka punas nitihka serunyut jeman.

    “Sebedau pengawa tradisional tu punas, kitai mesti matih orang indu sereta rebak baru diatu, ngambika pengawa tradisional seruran dikemeran.

    “Taja tu pengelandik tradisional, tang pengawa bansa tu ulih mai pejalai kitai jauh agi, laban ukai semina ngintu orang beranak di menua tu aja tang mega ba tikas global,” ku iya.

    Pengelandik ti dikembuan orang kereja enggau ‘Mama Care’ mega, ukai semina ngintu orang beranak aja, tang lebih ari nya, baka tau ngurut orang indu bukai, baik nya ke opis tauka ngagai rumah orang, ku iya.

    “Sida ke bejalaika pengawa enggau ‘Mama Care’ tu tau mindah ari siti endur ngagai siti endur, reti nya, servis tu ulih nerima peminta nengah telefon, lalu tukang urut tu tau ngejung rumah tauka opis kita,” ku iya, lalu nandu baru madahka ‘Mama Care’ mega udah nambah servis ngaga ‘Manicure’ enggau ‘Pedicure’ sereta ngurut pala.

    Servis ‘Mama Care’ ke tau dikumbai Penemu Orang Asal sigi patut diangkatka, sereta tau diberi setipikit.

    “Diatu nengah opis menteri kami, orang indu ke bisi pengerindu tauka bisi ati deka ngaga dagang ‘Mama Care’, tau dilatih ari baruh opis menteri kami, belajar penemu tradisional tu.

    “Nya alai, pengawa tradisional tu patut dilatih, sereta diberi setipikit, lalu kelimpah ari nya mega, sida ke belajar tu tau belajar pekara bukai baka pasal pekara pemakai, pengerai tubuh enggau terapi,” ku iya.

    Ba lansa bukai, iya madah ke taun tu, Hari Orang Indu iya nya Taun Negapka Orang Indu, ke udah dipunka Menteri Besai, Datuk Seri Mohd Najib Tun Razak bulan Januari tu tadi.

    “Kami deka mandangka pemujur semua orang indu ke bepengelandik di menua tu, nyengkaum di Sarawak, ni gaya pemujur sida ke udah digaga tauka benung digaga.

    “Tang aku mega minta timbal ari orang indu di Sarawak, ni baka pemansang ke deka digaga sida iya, nyema sida iya begunaka kus, kus bansa ni kedeka sida, enti deka nemu pasal genteran tusun ukum, ni gaya genteran tusun ukum diguna sida iya, tauka pekara bukai bekait enggau opis menteri kami,” ku iya.

    Hari Orang Indu taun tu ti berambai jaku ‘Taun Negapka Orang Indu’ deka dipunka ngagai mensia mayuh bulan Mac tu ila, di Universiti Lim Kok Wing, Cyberjaya, alai university tu mega bisi ngaga lagu ungkup Hari Orang Indu 2018.

    “Kami mega bisi laman web ‘Taun Negapka Orang Indu’, iya nya tmw18.com.my, alai laman web tu mega tau alai orang indu meri penemu sida bekait enggau pemansang sereta pemujur orang indu,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads