Header Ads

  • Berita Tebaru

    MANRED meseti fokus merambu pekara ti dikedeka peranak Kapit

    Jefferson Jamit
    KAPIT: Kaban Kunsil Nengeri (ADUN) Bukit Goram Jefferson Jamit minta Opis Menteri Betanam Betupi Moden, Tanah Adat enggau Pemansang Kandang Menua (MANRED) bejalaika pekara ti dikedeka sida ungkup Kapit.

    “MANRED meseti fokus merambu pekara ti dikedeka Kapit. Sambung jalai ngagai Sibu patut tembu dalam timpuh dua tauka tiga taun. Ari nya kami deka disambung ngagai serata nengeri. Kami mutarka isu timpuh jam pejalai perengka pengangkut sungai.

    “Tu maya kitai fokus nama pengawa ti ulihn dikereja Kapit ngagai ekonomi nengeri. Baka menua mansang ngagai ekonomi digital enggau komuniti bepenetai pemisi tinggi, raban orang bumai kitai patut ukai semina ngeluar dikena nangkup makit menua tu, tang nimpai jauh agi ngagai makit luar tauka eksport. Pekebun rian di Semenanjung Malausia nyual rian sida ngagai China,” ku iya.

    Ku iya, Kapit bisi dandang tanah besai, taja pia, raban orang bumai nadai belanja dikena ngemansangka tanah sida. Nya kebuah, sida begunaka perintah mantu sida. Tanah ditu engkeman endur nanam mayuh bansa utai tanam enggau kayu baka dabai, isu, isau, mawang, enggau ke bukai.

    Udah nya kitai bisi Ikan Empurau enggau Ikan Semah ti tebilang enggau kualiti iya. Aktiviti ngereja kampung enggau asil berikan mega majak nurun ari sukut bekal ikan ba endur asal iya di Batang Rajang, Batang Baleh, Sungai Katibas enggau anak sungai iya.

    Kitai mega bisi nenun pua kumbu ti dijual enggau rega tinggi ba makit. Perintah nengah Opis Betanam Betupi endang patut mantu ngelakuka industri tu ngambika raban orang bumai, berikan enggau mega sida ti betenun ulih nambahka penatai pemisi sida, ku Jamit merambu.

    Iya minta perintah numbuhka Palan Latih Betanam Betupi (ATC) di Kapit pulaika pemaik peranak menua tu ti rinduka pengawa bumai.

    “Kitai bisi Palan Latih Betanam Betupi Seputin tang ditutup dalam 20 taun ke udah. Kitai minta pengari rayat, Sapit Menteri Pemansang Menua Pesisir enggau Kandang Menua, Datuk Alexander Nanta Linggi, Kaban Parlimen (MP) Hulu Rajang Datuk Wilson Ugak Kumbong enggau ADUN Pelagus Wilson Nyabong Ijang sereta aku empu beratka peminta ngambika bisi ATC tu. Aku empu udah mantaika pekara tu ba Aum Kunsil Nengeri (DUN) pematut bisi pengawa numbuhka ATC,” ku Jamit.

    “Kapit endang beberita enggau dabai ti dijual enggau rega tinggi ba makit. Nya dijual RM35 sekilo di Kuching maya pedaja madahka ‘dabai dari Kapit’. Taja dabai bisi di serata nengeri, Kapit ngeluarka dabai pemadu manah.

    “Tu umbas endur kitai berundingka pengawa numbuhka ‘taman dabai’ enggau mega Palan Ngumpul, Nginjin enggau Nungkus ungkup dabai ngambika iya ulih digalau dijual ngagai makit menua luar, dikena nyemelaka rega enggau ngenegapka penatai pemisi raban orang bukai.

    “Kitai bisi kebun besai, pekara ti diguna kitai diatu ngerembaika makit ngagai makit menua tasik. Tu ulih nyadi fokus kitai ngagai buah bemusim,” ku Jamit.

    Program meri penerang diatur beserimbai enggau pejalai gawa Menteri Muda Betanam Betupi Dr Abdul Rahman, ke bisi ditu pengelama dua hari.

    Penulung Direktor Opis Betanam Betupi (Utai Tanam Dagang Besai) Dominic Chunggat, Pemesai Pengatur Pengawa Baijury Dzulhizam Spawi, Penulung Direktor Opis Betanam Betupi Kapit Badin Tunor, OCPD Kapit DSP Freddy Bian, Ambrose Abong Bugek ke nyadi Pemesai Pekara Khas Datuk Alexander Nanta Linggi, bala ketuai opis perintah enggau bala ketuai raban bansa antara bala ke bisi datai ngulu pengawa nya.

    Pejalai gawa dua hari berunggu nya mungkur pengawa meri penerang betanam betupi ari Badin Tunor ari Opis Betanam Betupi Kapit, ngabas taba Kilang Nginjin Pemakai Bletih, projek krafjari pua kumbu di rumah Fransiska Blantau di Taman Bukit Goram Height, Jalai Bletih, projek nupi ikan dalam pegung ikan Encik Joseph Jinggut di Teluk Gimang, Mujong, Baleh enggau projek Roti Canai di rumah Nurbaizura Abdullah di Kampung Muhibbah Bletih. #UtusanBorneo

    No comments

    Post Top Ad