Header Ads

  • Berita Tebaru

    Maskot jani PBDSB enda inkusif

    Datuk Snowdan Lawan
    Ulah nya ngaga ‘dinding’ ba komuniti pupu bansa di nengeri tu lalu chara nya mandangka PBDSB parti ti kelalu ngatika diri, ku Snowdan.

    KUCHING: Ketuai Nembiak Parti Rakyat Sarawak (PRS), Datuk Snowdan Lawan madahka pengawa milih gambar jani nyadika lambang Parti Bansa Dayak Sarawak Baru (PBDSB) ungkup Pengawa Bepilih Besai Ke-14 (PRU14) tu ila, endang enda inklusif lalu chara ti ‘kelalu ngatika diri’ parti nya.

    Ku iya, tu ngaga ‘dinding’ ba komuniti pupu bansa di nengeri tu.

    “Empas ari jaku tu balat nyima sereta nagang penama orang ti ngumbai jani tu jaku ‘tabu’ dalam pengidup sida,” ku iya lebuhka dikerandau, kemari.

    Ku Snowdan ke mega Menteri Muda Nembiak Lumba enggau Main nambah, pekara tu mega nyata mandangka ulah PBDSB ti deka ngatika diri lalu enda beguna orang bukai.

    “Berapa mayuh ti ulih dijapai kita enti kediri aja, maya kitai tau bisi mayuh kaban.

    “Tang kami dalam Barisan Nasional (BN) bisi penaluk gawa siti tim, udah ngiring ngagai mayuh pemujur,” ku iya.

    Ku Snowdan, kelia di rumah panjai bansa Dayak/Iban, jani endang nyadi jelu ti bekedayau sereta ngerusak utai tanam enggau utai tumbuh.

    Nya alai ku iya, jelu bukai baka rusa tauka pelanduk(taja mit tang manah dipeda), endang patut nyadi pilih ti manah agi.

    Ku iya, rusa seruran bejejaga sereta laju bejalai, ti ngayanka sensitiviti iya ngagai pekara ngelingi.

    “Taja pia, tu pilih sida, tang dudi hari jani deka dipunas ketegal pengelikun,” ku iya.

    Berebak enggau nya, Ketuai Pemadah PBDSB, Bobby William, nengah penerang berita nerangka lambang jani sida mai reti enggau empas ti dalam ari sukut adat lama komuniti Dayak.

    Taja pia, iya berasai sinu laban bisi sekeda raban ngumbai gambar jani nyima sensitviti bansa.

    “Jani tu lambang penyerakup pupu etnik Dayak di Sarawak,” ku iya.

    Pia mega ku Bobby, ba pengarap komuniti Dayak, jani nyadi orang tengah enggau Petara.

    Entara pengawa ti bekaul enggai jabi baka Nenung Ati Babi, Mandi Darah Babi, Nikika Bangkai enggau mayuh adat lama sereta penti pemali.

    “Nitihka pengarap, antu meda mensia baka jani.

    “Nya kebuah, dikearap semua rorang bebasa sereta meretika adat lama bansa Dayak lalu anang nuduh sengapa,” ku iya nerang. #UtusanBorneo

    No comments

    Post Top Ad