Mayuh inisiatif JPN mutarka penanggul dokumen pengelala - Berita Iban Online

Header Ads

  • Baru Nyadi

    Mayuh inisiatif JPN mutarka penanggul dokumen pengelala

    Dato Sri Fatimah Abdullah
    Sida enda semina nganti mensia mayuh datai ke opis JPN ngaga peminta sentang pekara bekaul dokumen pengelala .

    KUCHING: Menteri Pengintu Pengelantang Pendiau, Raban Bansa, Orang Indu, Ruang Bilik enggau Pemansang Nembiak Mit Dato Sri Fatimah Abdullah enda setuju tauka nyangkal penemu orang ti madahka Opis Pengerejista Bansa (JPN) semina nganti orang datai ngagai opis nya.

    Iya madahka diri enda setuju laban JPN bejalaika mayuh inisiatif dikena mutarka penanggul nadai dokumen pengelala diri, pasal peminta nyadi peranak menua (kewarganegaraan) enggau ke bukai.

    “Aku ngasaika enda manah amat madahka JPN semina duduk ba opis lalu nganti orang datai ngenataika peminta.

    “Laban kebendar mayuh inisiatif baka program ‘outreach’ dipejalaika JPN Sarawak sekalika ba renggat bagi menua tauka pelilih menua,  kelebih agi bekaul enggau mutarka penanggul peranak menua ke nadai dokumen pengelala diri.

    “Kenyau ari taun 2015 ngagai 2017, bisi 158 program ‘outreach’ udah dipejalaika JPN nengah chara nempa kerejasama enggau bala YB ba sesebangkah kandang endur, enggau bala penghulu sereta ketuai raban bansa,” ku iya.

    Fatimah mansutka pekara nya lebuh bejaku seraya bejadika pengerami nutup ‘Program Wacana Bestari: Masalah Dokumen Pengenalan Diri Di Bahagian Kuching dan Penyerahan Surat Kelulusan Permohonan Taraf Kewarganegaan di Bawah Perkara 15A’, ke diatur ba sebuah hotel ditu, kemari.

    “Ari 154 program ‘outreach’ ke dipejalaika Pasukan Petugas Khas JPN Sarawak ti deka mutarka penanggul peranak menua tu ke nadai dokumen diri, bisi 6,784 peminta udah diterima nengah program tu aja.

    “Lalu ari  penyampau nya nya bisi 4,554 peminta diterima sereta diproses,  laban bisi ke bendar udah nadai penanggul lalu bisi enda ulih diterima,” ku iya seraya pemayuh program outreach ke udah diatur ngayanka JPN Sarawak ukai semina duduk ba opis baka ti dipadahka seiku orang ke bisi datai ngagai Program Wacana Bestari nya.

    Berebak enggau tu Fatimah ngenang pasal Jawatankuasa Khas Status Kewarganegaraan di Bawah Perkara 15A Peringkat Negeri Sarawak ke ditumbuhka kena 23 Ogos 2016.

    Juluk penumbuh komiti nya deka mutarka kes peminta nyadi peranak menua di Bawah Perkara 15A, Perlembagaan Persekutuan dalam timpuh dua taun pengudah ditumbuhka.

    “Peminta nyadi peranah menua di Bawah Perkara 15A, Perlembagaan Persekutuan iya nya ngagai orang ke amat patut aja sereta beumur kurang ari 21 taun.

    “Kenyau komiti khas tu ditumbuhka, bisi 297 peminta tikas peranak menua udah dibantaika berengkah November 2016 ngagai Januari 2018 (enda nyengkaum September enggau Disember 2017).

    “Pagi tadi (kemari), Komiti khas kami tu udah baum ungkup siri Bulan Februari 2018. Bisi 25peminta udah diterima enggau diperesa,” ku Fatimah.

    Setipak enggau kominen ti diberi Sapit Menteri Besai Dato Seri Dr. Ahmad Zahid Hamidi ti mega Menteri Dalam Nengeri, bisi 92 surat kelulusan (31 peratus) peminta peranak menua di Bawah Perkara 15A, Perlembagaan Persekutuan tu udah dikemendarka naka ke diatu, ku Fatimah.

    Iya madahka deka meri status peranak menua mayuh prosedur ke patut dititihka nyengkaum proses ngerandau orang ke minta nyadi peranak menua, dikena nyeliahka ari salah beri nyadi peranak menua.

    Proses peminta nyadi peranak menua tu mungkur beberapa ejensi perintah nyengkaum ketuai raban bansa.

    “Sehari tu (kemari) bisi 42 surat kelulusan ti enda bansa, umur enggau bagi menua di Sarawak deka disua ngagai orang ke amat patut nyadi peranak menua,” ku iya seraya madahka sebedau tu bisi 50 surat kelulusan udah disuaka.

    Sama bisi datai ba pengerami nya Menteri Muda Pengelantang Raban Bansa Datuk Francis Harden Hollis enggau Menteri Muda Orang Indu, Ruang Bilik enggau Pemansang Nembiak Rosey Yunus sereta Direktor JPN Sarawak Jasni Jubli enggau ke bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads