Mensia mayuh dipinta seruran beratika rega barang maya musim pengerami - Berita Iban Online

Header Ads

  • Baru Nyadi

    Mensia mayuh dipinta seruran beratika rega barang maya musim pengerami

    BERATI: Tiong (dua kiba) maya beratika rega barang ba SKS sepengudah bejadi Skim Barang Dijaga Rega Taun Baru China 2018 ditu, kemari.
    SIBU: Mensia mayuh ti bebelika barang dipinta beratika rega barang nangika orang bejual beambi ulih kelebih agi maya musim pengerami tu.

    Chairman Opis Kaunsil Sibu (SMC) Datuk Tiong Thai King madah, mensia mayuh tau ngeripot ngagai piak ti bekaul nyema tetemuka orang bejual ngereja penyalah.

    “Pia mega sebedau meli barang bida dulu rega nya sebedau mutus meli,” pia ku iya madah ngagai pengarang berita.

    Dulu agi ari nya iya bejadi Skim Barang Dijaga Rega Musin Taun Baru China 2018 ba Sing Kwong Supermarket (SKS) ditu, kemari.

    Maya tu iya disempulang Ketuai Opis Menteri Dagang Dalam Nengeri enggau Pekara Bebeli Barang Sarawak (KPDNKKK) pampang Sibu Roslee Maslie enggau Direktor SKS Tang Kuok King sereta raban bukai bejalai meresa rega barang SKS dia.

    Tiong ti mega Kaban Kunsil Nengeri (ADUN) Dudong maya tu minta orang ke bejual ngayanka kelai rega barang ti udah ditentuka dijaga ba skim rambau hari besai ngena kelai linsu kalas.

    Iya madah, tu deka ngemuntangka mensia mayuh nemu bagi rega barang ke dijaga ba skim nya enggau barang jual ke bukai.

    “Ukai semina ngelantangka mensia mayuh bebelika barang tang deka nyeliahka orang bejual ari ke beambi ulih maya musin pengerami,” ku iya madah baru.

    Ba skim tu, KPDNKKK pampang Sibu udah netapka rega 12 bansa barang ke dijaga bagi Sibu, Kanowit enggau Selangau.

    Skim tu belabuh ari 10 Februari nyentuk 21 Februari tu lalu dipejalaika nengah Akta Kawalan Harga dan Anti Pencatuan 2011.

    Rega ti udah ditetapka iya nya tiap sekilo manuk idup iya nya RM6.70, manuk standard (RM8.50), manuk ‘super’ (RM9.50), kubis import (RM4), bawang burak (RM10), ikan bawal burak (RM35), undang burak besai (RM35), dagin jani/perut (RM19.50) sereta dagin jani/dagin enggau gemu (RM18.50).

    Rega sigi telu manuk gred A iya nya RM0.39, gred B (RM.038) enggau gred C (RM0.37).

    Mensia mayuh ti tetemuka orang bejual beambi ulih nyual barang maya musin pengerami tau mantaika ripot ngagai KPDNKK nengah lumur 03-8000 8000 tauka 03-8882 6088/6245, SMS ke 15888 (taip KPDNKK ADUAN (penerang diri)) tauka ngelawa opis KPDNKK ke besemak. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads