Header Ads

  • Berita Tebaru

    Meri awak ngagai Manyin ngayanka basa parti ngagai orang lama, ku Minos

    Dato Peter Minos
    KUCHING: Sepenemu enchalunka Dato Sri Michael Manyin Jawong nyadi mandal presiden Parti Pesaka Bumiputera Bersatu (PBB) ngarika pampang Pesaka ngayanka basa parti ngagai orang lama, pia ku veteran parti, Dato Peter Minos.

    Ku iya, kebuah pia laban Manyin siku ari bala ketuai lama dalam PBB, kala nyadi siku ari mandal presiden dalam beberapa penggal, sereta mega betaun udah nyadi menteri dalam kabinet nengeri.

    “Pengawa tu (sepenemu enchalunka Manyin nyadi mandal presiden kanan nyadi siti pugu pekara ngagai pampang Pesaka, pia mega ngagai bansa Bidayuh,” ku Minos kemari.

    Kena Hari Lima tu tadi, Chairman Mendam PNN, Datuk Amar Mohd Asfia Awang Nassar lebuh mantaika pemutus nama chalun ba pangku pengawa tetinggi parti ungkup Konvensyen PBB ti deka datai, madahka semina nama Manyin siku aja dichalun ungkup penuduk mandal presiden kanan ari pampang Pesaka.

    Pangku pengawa mandal presiden kanan ke bukai, ari pampang Bumiputera, meda penyandang Ketuai Nembiak PBB, Datuk Seri Fadillah Yusof nerima sukung penuh.

    Manyin enggau Fadillah bela disadang mangku dua pangku pengawa nya maya Konvensyen PBB ti berengkah diatur kena 9 Febuari tu.

    Asfia mega mantaika bala pengari ari kesemua 82 pampang PBB udah sepenemu mutuska sida ngundi Kepala Menteri Datuk Patinggi Abang Johari Tun Openg ngetanka penuduk nyadi Presiden PBB, lalu Sapit Kepala Menteri Datuk Amar Douglas Uggah Embas enggau Datuk Amar Awang Tengah Ali Hasan terus nyadi Sapit Presiden PBB.

    Ngelansa silik pasal pekara dibantaika nya, ku Minos, iya meri tabi puji ngagai pemutus digaga Datuk Abdul Karim Rahman Hamzah ti meri jalai ngagai Fadillah nyadi mandal presiden kana ngarika sayap Bumiputera.

    “Tu chukup manah enggau pemintar Datuk Karim, ngayanka penuai runding iya sereta pemikir ti bisi semangat, semua tu ungkup penyerakup dalam parti. Iya bebasaka Fadillah ti udah nyadi orang kanan dalam hierarki PBB sereta menteri penuh perintah besai.

    “Basa ngagai orang lama dalam PBB udah nyata sereta ngasuh temegah, pia mega Datuk Karim udah nyata ngayanka nya,” ku iya.

    Iya mega berasai lantang meda bansa minoriti enda dikelaung dalam PBB enggau sepenemu nyalunka Dato Sri Dr Stephen Rundi, Datuk Roland Sagah Wee Inn enggau Datuk Gerawat Gala ungkup tiga pangku pengawa mandal presiden ngarika sayap Pesaka.

    Ku iya, Dr Rundi, Sagah enggau Gerawat bela ngarika bansa Iban, Bidayuh enggau Orang Ulu.

    Taja pia, bisi pengawa berebutka empat pangku pengawa mandal presiden dalam sayap Bumiputera, dalam ari tujuh iku chalun iya nya Karim, Dr Abdul Rahman Junaidi, Datuk Julaihi Narawi, Datuk Talib Zulpilip, Dr Annuar Rapaee, Datu Len Talif Salleh enggau Dr Abdul Rahman Ismail.

    Ba pangku pengawa kaban kaunsil besai, bisi 16 iku kaban ari pampang Bumiputera enggau 14 iku kaban ari pampang Pesaka, dichalun ari penemu begulai.

    Sida 16 iku ari sayap Bumiputera iya nya Dato Ahmad Ibrahim, Datuk Ahmad Lai Bujang, Abdul Yakup Arbi, Zainulabidin Ismail, Buang Bolhassan, Ricky @ Mohammad Razi Sitam, Razaili Gapor, Awla Dri, Dr Hazland Abang Hipni, Yussibnosh Balo, Pandi Suhaili, Simoi Peri, Ripin Lamat, Awangku Jina Abedin Pengiran Jawa, Dato Mushid di-Raja Juanda Jaya enggau Hider Khan Asghar Khan.

    Ari pampang Pesaka, bala chalun iya nya John Ilus, Jefferson jamit, Daniel Jubang, Mikai Mandau, Japar Labaw, Dato Sri Dr James Dawos Mamit, Richard Tawan Sedu, Michael Mujah Lihan, Dennis Ngau, Paulus Dandee Banyang, Dato Robert Laing Anyie, Asiang Gihep, Datuk Ambrose Blikau Enturan enggau John Nyigor.

    Nitih ku Minos, seruran ngasuh lantang pasal parti PBB datai ari pekara ke alai iya parti politik pemadu besai di Sarawak lalu iya nyadi tulang belakang Barisan Nasiobal (BN) Sarawak.

    “Aku udah dalam PBB kenyau ari pun taun 1970an lalu aku nemu mimit pasal gaya ulah dalam parti. Lalu lebuh bala ketuai manah sereta gawa enggau meruan, udah nyadi budaya bebasa bala ketuai sereta deka dikemeran.

    “Semua tu ngayanka PBB endang parti politik ti tuai runding, nyangka aku tau nyebut pemadu manah sereta chukup tuai ba runding di Sarawak sereta mega di Malaysia. Iya bisi serakup, penuai runding, disiplin enggau pemintar, semua bisi dalam satu.

    “Nya kebuah, ba pengawa bepilih besai ti deka datai, tebal agi dipelaba dalam bulan Mac tauka April, PBB udah sedia sereta nyikap diri, lalu deka menang kesemua penuduh diagihka ngagai sida ari BN. Aku nadai berasai sanggu ba pekara tu,” ku Minos. #UtusanBorneo

    No comments

    Post Top Ad