Najib: Semaya mulaika kuasa deka dikeamat - Berita Iban Online

Header Ads

  • Baru Nyadi

    Najib: Semaya mulaika kuasa deka dikeamat

    BEJADI: Najib (tiga kanan) bejadi Gempuru Besai Parti Pesaka Bumiputera Bersatu (PBB) Ke-14 di Kuching kemari. Bela dipeda (ari kiba) Asfia, Uggah, Abang Johari, Awang Tengah enggau Rundi.
    KUCHING: Komiti Renggat Tinggi Perintah Besai deka ditumbuh ngambi ulih berandau lalu ngemujur atur mulaika kuasa ngagai Sarawak nengah Sempekat Malaysia 1963 (MA63) begulai enggau komiti ke sama renggat Sarawak.

    Menteri Besai Datuk Seri Najib Tun Razak madah komiti nya deka berandau enggau Komiti Renggat Tinggi (Sarawak) ti diuluka tiga sapit kepala menteri.

    “Aku udah meri semaya sentang pekara ke bekaul enggau MA63. Enti kitai sengaja tauka enda sengaja bisi ngambi kuasa rayat enggau hak orang Sarawak, aku sanggup mulaika kuasa nya ngagai Sarawak.

    “Kitai enda tau ngambi hak orang bukai. Kitai sebuah ruang bilik lalu ke pemadu berat kitai mengkang dalam Barisan Nasional (BN) enggau Malaysia,” ku iya.

    Najib mansutka jaku nya maya bejadi Gempuru Besai Parti Pesaka Bumiputera Bersatu (PBB) Ke-14 di Palan Aum Borneo Kuching (BCCK) ditu, kemari.

    Ku Najib nambah, kededua komiti ti ngarika Perintah Besai enggau Perintah Nengeri deka berandau lalu ngiga chara mutarka pinta Sarawak nya.

    Komiti Renggat Tinggi (Sarawak) diarika Tan Sri James Masing, Datuk Amar Douglas Uggah enggau Datuk Amar Awang Tengah Ali Hassan ke alai ketetiga bela ngulu pengawa bejadi Gempuru Besai PBB ke 14 kemari.

    “Abang Johari, anang irau Perintah Besai mega deka numbuhka Komiti Renggat Tinggi ngambi ulih berandau enggau ketetiga sapit kepala menteri.

    “Kitai berandau manah, ngiga chara mutar ke alai ba kabinet pan mayuh orang (menteri) ari Sarawak,’ku iya.

    Dulu agi ari nya Kepala Menteri ke mega Presiden PBB Datuk Patinggi Abang Johari Tun Openg ba jaku pengelalau madah fasa I randau sentang atur mulaika kuasa ngagai Sarawak udah tembu.

    Ku iya, randau nangkanka tu iya nya Fasa II deka bejuraika pekara ke bekaul enggau undang-undang.

    “Aku pechaya randau tu pan ulih dikemujur ari sukut undang-undang.

    “Enti tu mujur, rayat Sarawak deka senang lalu pia mega menua Malaysia,” ku Abang Johari.

    Bela datai ngerami raban 5,000 iku ari 82 pampang PBB iya nya Chairman Tetap PBB Datuk Amar Mohd Asfia Awang Nassar enggau Sekretari Besai Dato Sri Dr Stephen Rundi. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads