Operasyen Neritka Adat deka dipejalai beserimbai enggau pengerami TBC 2018 - Berita Iban Online

Header Ads

  • Baru Nyadi

    Operasyen Neritka Adat deka dipejalai beserimbai enggau pengerami TBC 2018

    DEKA MATAU: Sebuah ari perau laju enggi ejensi penerit adat benung mansa Terminal Penyangkai Ekspres.
    SIBU: Operasyen Neritka Adat beserimbai enggau Taun Baru China (TBC) 2018 deka dikemujurka enggau pengawa matau ngena perau laju ari ejensi penerit adat.

    Tu dikena nentuka pengelikun mensia mayuh bekenaka perengka pengangkut sungai sekumbang pengerami nya.

    Sekeda ari perau laju tu iya nya nyengkaum tiga buah ari Opis Sungai Sarawak (LSS), sebuah ari Opis Tasik Sarawak (JLWS) enggau sebuah agi ari Polis Marin.

    Chairman LSS Murni Suhaili madah, operasyen tu deka diatur ba dua tikas iya nya tikas keterubah belabuh 12 Febuari nyentuk 15 Februari lalu tikas kedua belabuh ari 23 Febuari nyentuk 25 Februari tu.

    “Operasyen tu diatur begulai JLWS, Ejensi Penerit Adat Maritim Malaysia (APMM), Polis, Opis Sukarelawan Malaysia (RELA), Opis Pengetan Pengelikun Periman Malaysia Nengeri Sarawak (JPAM) enggau Opis Menteri Dagang Dalam Nengeri enggau Pekara Bebeli Barang Sarawak (KPDNKKK),” pia ku iya madah ngagai pengarang berita, kemari.

    Iya mantaika pekara nya sepengudah bejadi Operasyen Neritka Adat beserimbai enggau Taun Baru China 2018 ba Terminal Penyangkai Ekspres ditu, kemari.

    Sama bela datai maya tu iya nya Contoller LSS Sarawak Richard Tajan enggau Pemantu Kontroler Wilayah II Hatta Morshidi.

    Nambahka jaku iya, Murni madah, pengawa matau pengelikun mensia mayuh tu ukai semina digaga ba penyangkai aja tang mega ba sekeda endur di sepemanjai sungai.

    Tu ku iya, dikena nentuka pengelikun ekspres mai mensia mayuh.

    “Ba operasyen tu, kitai deka meresa ekspres sebedau sida meleka laban kitai ngemeratka pengelikun ukai semina ekspres tang mega pengelantang mensia mayuh pulai kemisi maya tu.

    “Nengah tu mega kitai nyeliahka penyalah ekspres kelalu sarat ketegal mai mensia mayuh ngelui ari ke ditatak, nentuka semua ekspres tauka perengka pengangkut sungai ke bukai ngembuan permit sereta ngemeratka mensia mayuh meseti ngena jaket pengelikun,” ku iya nerang baru.

    Bekaul enggau penyampau mensia mayuh ke pulai kemisi maya hari besai tu, Murni madah, nyema patut piak sida deka ngemendarka sida ke beempu ekspres nambahka penyampau ekspres sida bejalai.

    Tang ku iya, sida meseti minta permit dulu.

    Dulu agi ari tu, iya enggau bala bukai bisi nyuaka penerang ngagai mensia mayuh ti nepan ekspres. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads