Header Ads

  • Berita Tebaru

    Ops Bantu, nyelamat sida ke tasah ampuh bah di Julau agi dipejalai

    DSP Bidol Noyeng
    JULAU: Palan Pengintu Pengatur Operasyen Tasah (PKOB) Pelilih Julau agi neruska Ops Bantu enggau nyelamat sida ke tasah bah masuk hari ketiga.

    Ketuai Polis Pelilih Julau, DSP Bidol Noyeng madah, bala kaban komiti nyengkaum Opis Bomba enggau Penyah Penusah Bintangor, Raban Penyaga Periman Bagi Menua Sarikei enggau Polis Marin Sarikei.

    Naka diatu sebuah palan pengenduh sementara dibuka ba SMK Julau No.2 sejak 7 Februari lalu ngengkahka urung empat ruang bilik ke bisi lapan iku orang.

    “Sida tu dibantu bala kaban komiti begulai enggau Opis Pengintu Pengelantang Pendiau Raban Bansa (JKM),” ku iya madah ditu kemari.

    Iya madah, PKOB Pelilih Julau bepalan ba Opis Pelilih Julau lama laban Opis Daerah Julau ke baru bisi kena bah kenyau 6 Februari nyentuk ke diatu.

    Beduduk ari nya, sekeda sitak jalai enggau ke menua ke beemperan nadai ulih lawa nyengkaum Jalai Julau-Entabai ampuh bah kenyau 6 Februari tu tadi.

    Kelimpah nya, sekeda sekula nyengkaum SK Nanga Lasi, SK Luau, SK Meluan, SK Nanga Entabai, St Alphonsos mega enda ulih lawa ketegal penusah bah.

    “SK Nanga Serau pemadu balat ampuh lalu ditutup kenyau 6 Februari tu tadi,” ku iya.

    Kenu ku iya, aktiviti ninting hari peranak rumah panjai tejanggal lalu sida seruran bejimat laban takah rumah panjai sida enggau sungai enda jauh umba beemperan.

    Entara rumah panjai ke bisi kena bah iya nya Rumah Edward Kungor, Rumah Jana Batu Matop, Rumah Rengayan, Rumah Margaretta enggau ke bukai.

    Bidol madah, semua piak ejensi pemantu enggau penyah penusah agi neruska pengawa nyelamat sereta matau palan ke bisi kena bah seraya nganjung bantu.

    “taja tikas ai ba Sungai Kanowit enggau Sungai Julau udah mupuk surut tang pengawa matau agi seruran dipejalai,” ku iya.

    Tembah mega, Raban Soldadu Malaysia (ATM) mega bisi ngesah seraya nganjung bekal pemakai ngagai sitak rumah panjai ke kena bah.

    “Bisi lapan iku kaban ATM nurun ngesah ngena trak lalu nganjung bekal pemakai ngagai rumah panjai ke kena bah seraya nyuaka bantu JKM,” ku iya. #UtusanBorneo

    No comments

    Post Top Ad