Header Ads

  • Berita Tebaru

    Orang dagang meseti ngerebut peluang ngena teknologi

    Datuk Mohd Naroden Majais
    Dikena ngemesai sereta ngelakuka produk dagang seriris enggau peminta perintah nengeri ti ngangkatka DE, ku Mohd Naroden.

    BINTULU: Orang dagang di nengeri tu patut ngerebut peluang enggau ngena perengka guna teknologi internet dikena ngelakuka produk sereta ngemesaika rentayan dagang sida ukai semina dalam menua tu tang mega ke selampur dunya seriris enggau pengawa perintah nengeri ti deka ngangkatka aktiviti ekonomi digital (DE) di nengeri tu.

    Menteri Muda Pemansang Dagang Mit enggau Jelan Pemesai (PKS) ke mega Menteri Muda E-Dagang Datuk Mohd Naroden Majais madah, dunya udah berubah enggau pemansang teknologi internet lalu ba dini palan pan orang ngena teknologi nya nyentukka meri empas ngagai chara semua orang bekereja.

    “Kitai ulih nerima, nganjung penerang, ngelakuka produk nengah ‘on-line’, ngaga peminta sereta mayar nengah nya enggau mudah, lengkas sereta murah lalu makit dagang mega besai agi.

    “Teknologi ngembuan mayuh pengelebih enti dibanding enggau chara lama laban enda ngira ba dini endur kitai diau nyengkaum di kandang menua pesisir, segai bisi sambung internet, produk kita ulih dikelakuka,” ku iya bejaku ngarika Kepala Menteri Datuk Patinggi Abang Johari Tun Abang Openg di Pengerami Makai Lemai sereta bejadika Pekit Renggat Kepenudi Qipao Dunya 2018 ba Hotel Parkcity Everly malam kilah ensana.

    Ku iya madah, enda ngira sekalika bisi ngaga dagang mit tauka besai, semua nya sama serak ketegal pengawa bedagang ulih digaga ngena chara sama enggau begunaka teknologi internet.

    Berindik ari nya, perintah nengeri ari baruh pegai kepala menteri benung chakah ngaga sereta ngelakuka ekonomi digital seraya udah ngagihka RM1 bilion dikena nambah pemesai bungkur enggau pengelaju sambung internet di nengeri tu kelebih agi di kandang menua pesisir.

    “Nengah chara nya orang dagang kelebih agi bala orang ti bumai ba menua pesisir muntang deka tetulihka penerang bekaul produk bumai ke digaga, chara nyaga nengah teknologi dalam pengawa bumai sereta meri jalai ngagai orang ti bumai ngelakuka produk bumai sida ngagai makit ke besai agi,’ ku iya nandu.

    Berindik ari nya, iya minta bala orang dagang di nengeri tu bechuntoka Jack Ma iya nya siku orang dagang di China, penanam puku sereta orang ti suah meri bantu ke mega penengkebang enggau chairman eksekutif Alibaba Group iya nya sebuah palan dagang ti ngena teknologi maya ti bejalaika pengawa dagang.

    “Jack Ma iya nya orang dagang ti bejualka produk bumai nengah internet lalu diatu iya udah ngembuan 200 pampang dagang di selampur dunya. Ari siku orang ti miskin, diatu iya nyadi orang ti pemadu nyulut dalam dagang internet di China enggau selampur dunya.

    “Iya siku orang ke berani sereta inovatif nanam puku ba menua luar nyentuk mujur sereta mansang diatu, lalu pekara tu patut nyadika chunto orang dagang kitai dikena ngemansangka diri,” ku iya.

    Ku iya, nengah teknologi ‘on-line’ nyadi siti singkang ke mua entara nya mayar enda ngena mata suit baka ti digaga ba menua Chine ti mega sama bisi digaga orang dagang ba tisi jalai.

    Ku iya, dikena nyambut peminta sereta nyukung pengawa bansa nya, raban orang dagang patut bekerejasama enggau ejensi perintah ti bisi program bantu mayuh mekuh ke pekara dagang.

    Beserimbai enggau nya, iya mega minta orang dagang ngambi peluang dikena ngaul diri dalam pengawa dagang sektor ti nangkan lalu beratika pematut perengka guna ke disedia baka palan penyangkai kapal ba kandang menua Kidurong enggau Samalaju nyengkaum pemansang dalam mayuh industri baka minyak enggau gis di Bintulu.

    “Paling enda RM30 bilion puku di Bintulu ungkup industri ti udah bejalai lalu deka dipejalai lalu benung digaga. Peluang ungkup industri ti nangkan tu mega bisi mansang enggau manah sereta nerima peminta ti mayauh.

    “Tu ketegal perintah bejalaika Koridor Kuasa Ulih Dikena Baru Sarawak (SCORE) ukai semina ungkup eksport industri tang mega muka awak dagang ngagai peranak Sarawak,” ku iya nambah.

    Nengah peminta ngulihka agih belanja tambah ungkup meli Apheresis Platelet Machine (ALP) ti berega RM275,000 iya udah meri jamin deka mai pekara nya ngagai kepala menteri.

    Dulu agi ari nya Chairman Komiti Orang Ngabas Sepital Bintulu Pemancha Datuk Dr Francis Toh madah, ba Sarawak semina tiga palan ti ngembuan mesin nya, iya nya ba Miri, Sibu enggau Kuching lalu Bintulu ti ngembuan penyampau mensia mayuh urung 300,000 iku nadai mesin nya.

    Ku iya, pemanah mesin tu iya nya siku orang ti meri darah ulih nyelamatka tiga iku orang enti dibanding enggau chara lama iya nya empat iku orang ti meri darah semina ulih nyelamatka siku orang.

    “Ketegal pekara tu Hospital Bintulu begunaka mesin tu ngambika mayuh agi nyawa ulih diselamatka. Aku beterima kasih ngagai Gerempung Ukai Dikuasa Perintah (NGO) enggau komuniti ti udah meri bantu nyentukka kitai teulihka RM200,000 tang bedau chukup lalu minta pekara tu ditangkan ngagai kepala menteri,” ku iya.

    Iya madah, semua piak nibuh irau nyema bisi lebih ari pupu nya laban mayuh agi misin bukai patut diganti baka mesin hemodialisis ti udah sepuluh taun pengelama. #UtusanBorneo

    No comments

    Post Top Ad