Header Ads

  • Berita Tebaru

    Orang indu dipinta seruran ngemeratka pekara pengerai

    Dennis Ngau
    Kelebih agi sida di menua pesisir patut ngena memanah perengka guna sepital, klinik pengerai ke disedia, ku Dennis.

    MARUDI: Orang indu kelebih agi sida ke diau di menua pesisir endang diperansang nyaga pengerai diri enggau manah sereta ngena memanah perengka guna sepital sereta klinik pengerai ti bisi digaga di menua pesisir endur nerima perubat.

    Kaban Kunsil Nengeri (ADUN) Telang Usan, Dennis Ngau madah raban indu patut ngemeratka pengerai diri enggau sida sebilik ke bukai.

    “Nyadi indu di menua pesisir, bala kita patut seruran beratika pekara pengerai diri enggau kita sebilik, bejalaika pengawa nagang bemacham bansa penyakit laban pengawa nagang manah agi ari berubat,” ku iya.

    Tambah mega ku Dennis, gaya di menua pesisir bisi sekeda jauh ari palan berubat enggau ngintu pengerai, tu nyadi pengawa tumu dikena nagang penyakit endang beguna amat.

    “Seruran siru sereta ngemanahka tikas pengerai diri lalu patut ngena perengka guna sepital, klinik pengerai perintah sereta suah agi beperesa pengerai, abis nadai sekali tauka dua kali setaun,” ku iya nandu.

    Dennis mansutka jaku nya lebuh bejaku ba pengawa ngelanjarka Program Wellbeing Of Woman (WOW) ti diatur Pemansang Orang Indu enggau Ruang Bilik Sitak Parlimen (PWKK) P.220 Baram  yang diadakan di Rumah Lalo Akang, di Sungai Selejau Melikat, semak ditu, apin lama ke udah.

    “Kelimpah ari nya kitai mega meseti seruran nyaga pemanah gamal diri tauka chara kitai begaya ngena gari ti meruan sereta manah dipeda orang,” ku iya.

    Dennis mega dekaka raban indu kelebih agi di menua pesisir ngambika seruran ngemeranka ulah bebasa, angkun sereta mereti, taja ba dini alai sida pegi, ngambika ditunda bala anak enggau indu ke bukai.

    Sama bisi datai Chairman Kaunsil Pelilih Marudi, Edward Mendai, Chairman Pemansang Orang Indu enggau Ruang Bilik (MPWK) sitak Baram, Mujan Lah, Ketuai Raban Bansa Temenggong Elizabeth Deng sereta Ketuia Komuniti, Tuai Rumah (TR) Lalo Akang. #UtusanBorneo

    No comments

    Post Top Ad