Palan ngenduh penusah ampuh bah di Selangau deka ditambah - Berita Iban Online

Header Ads

  • Baru Nyadi

    Palan ngenduh penusah ampuh bah di Selangau deka ditambah

    Palan ngenduh sementara di SJK (c) Tong Ah
    SELANGAU: Palan endur ngenduh penusah ampuh bah di Selangau deka ditambah nyema penusah nya majak nyadi.

    Sapit Pemesai Pelilih Selangau Anyie Awing madah, naka ke diatu udah bisi tiga bengkah endur digagaka alai mensia mayuh ngenduh enda lama ketegal rumah sida ampuh bah.

    Iya madah, tu nyengkaum Balai Mensia Mayuh Skuau, Sekula Primari (SK) Bukit Arip enggau SK Tong Ah.

    “Kitai deka nambahka palan ngenduh nitihka gaya ampuh bah.

    “Nyema ditambah baru palan ngenduh tu deka digaga ba SMK Ulu Balingian, SK Batu 36 Tamin, Balai Mensia Mayuh Selangau, Gerija Katholik St Charles enggau Balai Mensia Mayuh Serakup Iban Dayak Selangau (PEDAS),” pia ku iya madah maya berandau enggau pengarang berita, kemari.

    Naka ke diatu ku Anyie, ba Balai Mensia Mayuh Skuau, peranak rumah panjai ti dipindahka ba endur tu iya nya ari Rumah Minggu enggau Rumah James Medan.

    “Sida ari Rumah Kusah, Rumah Janting, Rumah Gasan enggau Kelinik Sungai Arip sereta bala nembiak enggau pengajar SK Bukit Arip dibai mindah ngagai Balai Mensia Mayuh SK Bukit Arip.

    “Peranak Rumah Jani, Rumah Awa, Rumah Belayong, Rumah Pasang enggau Rumah Hellen mindah ngagai Balai Mensia Mayuh SK Tong Ah,” ku iya nerang.

    Anyie mega madah, Bilik Operasyen Ampuh Bah Pelilih Selangau udah dibuka kenyau ari lemai kilah ensana.

    Bilik tu ku iya, dibuka ngambika mensia mayuh muntang agi nemu bagi penerang ke pemadu baru sentang penusah ampuh bah ba pelilih nya.

    “Bilik tu dibuka 24 jam sehari lalu mensia mayuh tau betanya ngagai bilik tu nengah lumur 084-891 321 tauka 014-8918724.

    “Semua raban macham bengkah ejensi nyengkaum soldadu semampai besedia napi penusah tu,” pia ku iya madah, kemari.

    Ku iya, ketegal penusah nya mega, diatu udah bisi tiga bengkah endur ngenduh disediak ba dia.

    Ngelansa sentang jalai ampuh ai, Anyie madah, peninggi ai ngampuhka Jalai Sibu-Bintulu semak Sungai Arip, ditu, mengkang empai ulih ditengah kerita mit.

    “Peninggi ai ngampuhka jalai tu kira bisi tengan dada.

    “Ai berengkah besai kenyau ari pukul 9.30 malam ensana,” ku iya madah.

    Kelimpah ari nya ku iya, raban Opis Pengetan Pengelikun Rama Malaysia (APM) enggau soldadu bela besaup beratika pengelikun ba endur ampuh bah.

    Sida mega nyaup mensia mayuh mai mutosikal ngena perau APM. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads