Header Ads

  • Berita Tebaru

    Parti politik ari luar enda ulih nagih hak Sarawak, Abang Johari

    ADAT: Abang Johari (sebelas kanan) ngaul diri ba pengawa bejadika ‘Lo Hei Yu Sheng’ kelai Taun Baru China.
    MIRI: Juluk enggau tungga kuing Sarawak bepanggai ba pengulih empat parti komponen Barisan Nasional (BN) nengeri nyaga enggau mulaika baru hak ari perintah besai.

    Kepala Menteri Datuk Patinggi Abang Johari Tun Openg madahka peranak Sarawak enda begunaka parti politik luar enggau orang ari luar gawa negika hak sida.

    “Sarawak bisi ruang bilik kediri empu, pengidup Sarawak dudi hari bepanggai ba sida sebilik, datai ari BN PBB, SUPP, PRS enggau PDP. Tu empat ketuai bilik ti ulih nyaga Sarawak,” ku Abang Johari rambau pengerami makai lemai Taun Baru China diatur Parti Sa’ati Rayat Sarawak (SUPP) Miri kemari.

    Nitih ku Abang Johari, tungga kuing Sarawak bepanggai ba empat ruang bilik tu lalu ukai parti luar. Empat parti tu nyadi empat parti besai ti nyaga Sarawak.

    Abang Johari, ke mega Chairman BN Sarawak, madahka ari serakup semua rayat, perintah nengeri ulih berandau enggau perintah besai ngulihka hak ti lenyau.

    “Kitai begunaka peranak Sarawak ngambika nyaga Sarawak, ukai DAP, PKR ti meseti ngasika jaku Presiden sida, orang luar,” ku iya nambah.

    Nitih ku iya, Sarawak diatu berani bejaku lalu nadai penangi ngetanka hak iya.

    Ku iya, perintah besai mega enda ulih ngenggaipka hak Sarawak lalu kuasa nengeri ti nyaga, matau enggau ngatur pemansut asil iya empu.

    Antara iya, iya nya kuasa ngeluarka lisin di baruh undang-undang tanah enggau 1958 Oil Mining Ordinance dianjung ngagai pengeluar enggau kunteriktor industri minyak enggau gis, ku iya madah.

    “Laban semua tu hak kitai, maya kitai teulihka hak diri, kitai ulih bekunsika pengaya, tang kitai nadai ati sanggu bekereja enggau Petronas, taja pia kitai patut minta pemendar kitai dulu, baka adat bansa Melayu, maya datai ngusung rumah, datai kitu, meri tabi basa, nanyaka penyadi rumah,” ku iya.

    Bekenaka kuasa konstitusyen Sarawak, ku iya, perintah nengeri enda nangika pejalai projek besai ti pulaika penguntung peranak baka Grid Ai Nengeri, iya nya projek grid bekal ai ari Kuching ngagai Lawas.

    Tu nyengkaum ngulihka mayuh agi agih belanja ari perintah besai nentuka penyulut projek ungkup rayat.

    Ku iya, projek tu ulih tembu dalam timpuh tujuh ngagai lapan taun ti ngaul belanja RM7 bilion.

    Tambah mega minyak enggau gis, ku Abang Johari ke lalu nyadi Chairman BN Nengeri madah, Sarawak mega kaya ba pemansut ai ti ulih dikemansang ke dalam kuasa hidrogen nyadi eksport nengeri sereta pemansut asil nengeri.

    Pemansang ekonomi digital mega ungkup timpuh panjai lalu pengawa nyediaka Sarawak nangkup peminta revolusyen industri 4.0.

    “Kitai meseti bebendar agi gawa ngemansangka Sarawak nyapai nengeri mansang datai ba taun 2030,” ku iya nerang.

    Ba lansa bukai ku Abang Johari, SUPP diperati deka ulih ngerampas baru penuduk parlimen Miri maya Pengawa Bepilih Besai (PRU) ti deka datai.

    Kitai dekaka penuduk Miri dikena nyumanka parti BN dikena ngemansangka agi pemansang peranak Miri.

    “SUPP udah pulai baru laban SUPP udah suman, kitai meseti megai Miri baru, Miri endang patut dipegai kitai,” ku iya rambau pengerami lemai nya.

    Ari sukung BN, besai pengulih dalam industri minyak enggau gis ditu ulih dikemansang sereta mega mansutka penatai pemisi Miri, ba kesemua pemansang ekonomi.

    “Miri patut dimenang BN, ungkup peranak Miri nya empu, ukai ungkup aku, ukai ungkup Dr Sim (Presiden SUPP - Prof Datuk Sim Kui Hian) tang ungkup rebak dudi hari, peranak Miri,” ku iya.

    Miri, sebedau tu nyadi kubu kuat BN, alah ngagai PKR rambau PRU 2013, MP Miri iya nya Ketuai PKR Miri, Dr. Michael Teo Yu Keng.

    Abang Johari mega setuju enggau penemu Datuk Bandaraya Miri, Adam Yii, ti deka ngaga balai mengeri besai ditu.

    Ari sukut dagang temuai, perintah nengeri deka gawa begulai enggau Menteri Dagang Temuai, Seni enggau Main Asal, Datuk Lee Kim Shin, ngemansangka industri dagang temuai ditu.

    “Kitai deka nyaup ngemansangka Miri, tang kitai meseti ngulihka mayuh agi agih belanja nyema kitai dekaka royalti minyak, kitai deka ngena iya gawaka Miri,” ku iya.

    Iya meri pengaga ati ngagai SUPP enggau Prof Datuk Sim ti udah mujur nambahka pengandal rayat dalam penau gawa enggau pengawa nyadi ketuai parti sida.

    Antara bala bisi datai ngulu pengerami lemai nya iya nya Presiden SUPP Prof. Datuk Sim Kui Hian, Kaban Kunsil Nengeri (ADUN) Senadin Datuk Lee Kim Shin, Menteri Dagang Temuai, Seni, Main Asal enggau Lumba Datuk Abdul Karim Rahman Hamzah, ADUN Piasau Datuk Sebastian Ting, MP Sibuti Datuk Ahmad Lai Bujang, ADUN Bekenu Rosey Yunus, ADUN Marudi, Datuk Penguang Manggil, ADUN Kabong, Mohd Chee Kadir, ADUN Lambir, Ripin Lamat enggau Datuk Bandaraya Mengeri Miri Adam Yii. #UtusanBorneo

    No comments

    Post Top Ad