Parti Rakyat Sarawak deka nyabung dua chalun baru - Berita Iban Online

Header Ads

  • Baru Nyadi

    Parti Rakyat Sarawak deka nyabung dua chalun baru

    Tan Sri Datuk Amar Dr James Masing
    KUCHING: Presiden Parti Rakyat Sarawak (PRS) ke mega Sapit Kepala Menteri Tan Sri Datuk Amar Dr James Masing netapka PRS deka nyabung dua chalun baru ba Pengawa Bepilih Besai Ke-14 (PRU14).

    Kelimpah ari nya, iya mega madah parti deka nyabung chalun ari raban orang indu serak tu lalu rintai nama chalun ngarika PRS ba enam penuduk parlimen udah dianjung ngagai ketuai renggat tinggi Barisan Nasional(BN).

    “Kitai (PRS) udah mutuska rintai chalun. Siti parlimen, siku nama lalu tu mih dikemeran PRS kenyau ari taun 2002.

    “Aku udah nempuh dua pengawa bepilih nengeri sereta dua pengawa bepilih parlimen ngelama nyadi presiden lalu rintai nama chalun sigi diterima.

    “Aku nganjung siku nama chalun ungkup siti penuduk lalu nadai kala napi sebarang penanggul ke alai aku mega nyadang rintai nama tu sekali agi deka diterima ungkup PRU14 tu,”ku iya lebuh dikerandau kemari.

    Ngenang kaul ke sama, Masing ke mega ADUN Baleh madah Datuk Joseph Salang deka sekali agi ngarika PRS ba penuduk parlimen Julau ba PRU14.

    Ku iya, kes sekeda orang nyengkaum ari PRS ti keran deka nyadi chalun ba penuduk nya (Julau) ukai pekara ke besai.

    “Pekara tu deka diputar ba keretas undi. Enti sida deka bediri kitai enda ulih nagang.

    “Parti udah mutus diak Dato Salang deka nyadi chalun di Julau,’ku iya.

    PRS ba PRU14 deka nganjung chalun ba enam penuduk parlimen iya nya parlimen Sri Aman, Lubok Antu, Selangau, Julau, Hulu Rajang enggau Kanowit.

    Dipinta ngenang sentang pinta Presiden SUPP Datuk Dr Sim Kui Huan ngelalau semua orang ke kala nyadi kaban dalam parti kelebih agi sida ke udah  nyereta penyakal pulai berakup dalam SUPP baru, Masing madah nya siti pekara ke manah ungkup BN Sarawak.

    Ku iya, enti munyika padah Sim dia SUPP ulih menang semua tujuh penuduk, reti nya BN Sarawak deka nguasa semua 31 penuduk parlimen.

    “Enti kitai nguasa semua 31 penuduk, reti nya rayat Sarawak nyukung kitai ba atur nagih kuasa ke patut dipulai ngagai Sarawak nitihka Sempekat Malaysia 1963 (MA63).

    “Enti DAP ngasai tu mih pekara ke patut ditegika Sarawak, sida patut berakup dalam SUPP,”ku iya.

    Masing nambah pengelebih megai kuasa ba 31 penuduk parlimen deka meri kuasa ke besai agi ngagai Sarawak ba atur nagih kuasa nya.

    “PRU14 nyadi palan ke pemadu manah endur kitai mandangka ngagai peranak Semenanjung Malaysia enda ngira bagi sapa ke megai perintah diak kitai keran dekaka kuasa tu diberi pulai.

    “PRU14 nyadi hak Sarawak ke lai MA63 nyadi pekara ke dikemerat kitai lalu semua parti meseti begempung,’ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads