Header Ads

  • Berita Tebaru

    Pedagang Bumiputera diperansang ngemeranka bidang perubat asal

    Miro Simuh
    KUCHING: Kaban Kunsil Nengeri (ADUN) Serembu, Miro Simuh meransang pedagang Bumiputera kelebih agi dipelilih menua Bau, ngambika berani ngemeranka bidang perubat urut asal.

    Kebuah pia, perubat urut asal nya ukai semina ketegal majak tebilang tang bidang nya ulih mantu nyungkak penatai pemisi, ku iya.

    “Pengawa muka palan perubat asal baka bekam, urut asal enggau akupuntur, ngayanka bidang perubat nya agi digiga tauka diguna raban bansa ke nyadi perubat alternatif kelimpah ari perubat moden.

    “Perubat chara asal enggau moden ulih segulai dalam pengawa kitai mutarka penanggul ke ditapi pesakit.

    “Entara servis perubat asal ke ulih dipejalaika orang dagang Bumiputera baka urut spa, urut pengudah beranak enggau maya bepantang, urut orang tuai, ngias gamal diri enggau ke bukai,” ku iya maya bejadika sebengkah palan urut asal ba Bau apin lama.

    Berebak enggau tu iya mega ngelalau sereta meransang mensia mayuh ngambika datai ngagai palan urut asal ti sah sereta diaku ngambika nyadi servis sukung ngagai perubat asal kelimpah ari ngenukuka perubat bisi pemanah sereta pemisa.

    Seraya ngingat, palan perubat asal nya enda tau enda nitihka atur ke udah ditetapka raban penerit adat , iya nya enda ngatur pengawa ke ulih ngeruga nama palan nya empu.

    Lebuh ti ngenang pasal perubat asal nya, iya madahka dulu kelia sebedau perubat moden datai, mensia  mayuh endang bepanggai ba perubat chara asal dikena ngubat tauka ngeraika mayuh macham penyakit.

    Lalu ku iya, tetiap bansa di dunya ngembuan chara perubat asal kediri empu sereta dikemeran enggau ditampung rebak dudi. #UtusanBorneo

    No comments

    Post Top Ad