Pekit Rakit Safari Baleh-Kapit 2018 diatur 6 - 8 April - Berita Iban Online

Header Ads

  • Baru Nyadi

    Pekit Rakit Safari Baleh-Kapit 2018 diatur 6 - 8 April

    Joseph Belayong Punan
    KAPIT: Residen Bagi Menua Kapit, Joseph Belayong Punan, ke nyadi Chairman Pengatur Pekit Rakit Safari Baleh-Kapit 2018 madah, (renggat ke-23 pekit nya kenyau berengkah diatur ari taun 1996) deka diatur berengkah ari 6 ngagai 8 April tu,lalu nesau semua ngambi bagi dalam pekit nya.

    “Taun tu, pemekit deka beleka ari Rumah Naga Anak Sulok, di Nanga Merating, Sungai Bena, anak Sungai Sut, Baleh kena 7 April lalu ba hari kedua (8 April), Sida deka dilepas ari Rumah Bengau Anak Andah, di Lepong Sut, Batang Baleh ngagai Palan Penyangkai Ekspres Kapit,” ku Belayong lebuh nyadi chairman aum komiti keterubah Rakit Safari Baleh, baumka penumbuh kaban komiti, apin lama ke udah.

    Belayong ngarapka rakit safari taun tu deka richah agi nyerumba pengawa ngatur renggat ke-23, ditambah enggau mayuh atur pengerami ke bukai nyengkaum Pesta Kapit, Regata Mini (lumba bot laju), main asal, bansal mandang sereta pengawa bejualka kraf jari.

    Ku iya, Serakup Bot Laju Bagi Menua Kapit deka ngatur Regata Mini ungkup pekit lumba bot laju ti mungkur mayuh bengkah kategori baka Bot 18hp Tunnel, Bot 30hp Tunnel enggau bot 40hp Tunnel.

    Timpuh pejalai ari Rumah Naga di Nanga Merating, Sungai Bena, Sut ngagai Pasar Kapit ngena perau panjai antara 3 ngagai 4 jam, mansa Sungai Bena, Sungai Sut, Baleh lalu pansut di Batang Rajang, ke alai sida ti berakit ulih bayam penyiru ai sungai di Sungai Bena enggau Sut seraya ulih ngayam pemanah rampa menua rumah panjai Iban di semanjai tebing sungai.

    Dikena nentuka mayuh agi bala pesereta ngambi bagi ba pekit taun tu, Belayong minta semua ejensi perintah enggau bala ketuai raban bansa bela nganjung tim sida.

    “Semua timpuh pejalai pekit berakit antara 6 ngagai 8 jam, taun tu sida berakit enda entu jauh lalu kededua rumah panjai datai jalai, urung 30km penyauh ari pasar Kapit. Nya alai, kitai ngarapka mayuh agi pesereta ngambi bagi dalam pekit taun tu,” ku Belayong.

    Pekit berakit nyadi pengerami dagang temuai besai ninting taun di Kapit di semanjai anak sungai di Batang Baleh ke berakit nuju adan ba Palan Penyangkai Orang Tambang Kapit.

    Pengerami tiga hari berunggu nya nyendiaka awak ngagai bala pesereta diau bemalam lalu ngasaika penyiru basa di dua buah rumah panjai Iban, didirika di tebing sungai.

    Pekit tu diatur Opis Residen Kapit nengah kerejasama enggau Raban Gawaka Dagang Temuai Kapit enggau semua ejensi perintah sereta raban NGO ke udah dipilih enggau sukung ari Dagang Temuai enggau Pesaka Asal Sarawak,Kaunsil Dagang Temuai, Opis Menteri Pemansang Rama sereta Kaunsil Ngelakuka Dagang Temuai.

    Pom tama pekit ulih diambi ari Opis Residen Kapit maya jam opis gawa. Penerang silik tau betanya ngagai sekretariat ba lumur 084-796230 tauka 084-796445 tauka nengah website di www.kapitro.sarawak.gov.my.

    Semua bisi enam kategori dipekit nyengkaum Lelaki Tebuka, Lelaki Tetutup, Free Style, Indu Tetutup, enggau kategori baru, Bot Bekayuh enggau Rakit Pemadu Manah Diiyas. Pekit bekayuh tu mulaika kenang mensia mayuh pemesai guna perengka pengangkut sungai kelia nyentuk ke sehari tu ke agi nyadi jalai pengangkut besai, laban nadai sambung jalai darat.

    Perais manah nganti bala pemenang. Tim bulih gelar champion dalam kategori Lelaki Tebuka deka pulai mai perais mata duit RM3,000 enggau trofi, lumur dua nerima RM2,500 enggau trofi, lalu lumur tiga RM1,500 enggau trofi lalu tim ba penuduk keempat deka nerima RM800, kelima RM700 enggau keenam RM600, lalu sida bulih penuduk ketujuh ngagai kesepuluh bela nerima RM500 enggau trofi.

    Ba kategori Lelaki Tetutup, Free Style, Indu Tetutup enggau Perau Bekayuh, tim bulih gelar champion deka nerima perais mata duit penyampau RM2,000 enggau trofi, lumur dua RM1,500 enggau trofi, lumur tiga RM1,000 enggau trofi lalu tim bulih penuduk keempat nerima RM700, kelima RM600, keenam RM500 lalu sida ba penuduk ketujuh ngagai sepuluh bela nerima perais mata duit RM400 sereta trofi.

    Perais ungkup kategori Rakit Pemadu Manah Diiyas deka diputuska kaban komiti pengatur ila.

    Sama bisi datai baum Pemesai Pelilih Bukit Mabong, Douglas Pungga, Sekretari Peribit Sapit Kepala Menteri Tan Sri Datuk Amar Dr. James Jemut Masing, Robert Liman sereta sekeda bala ketuai ari mayuh bengkah opis perintah. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads