Header Ads

  • Berita Tebaru

    Pemutus sapa nyadi chalun dilempai ba ketuai tinggi BN, ku Wan Junaidi

    Datuk Seri Wan Junaidi Tuanku Jaafar
    KUCHING: Enda nyadika penanggul ngagai Menteri Pengeraja Asal enggau Rampa Menua Datuk Seri Wan Junaidi Tuanku Jaafar enti bisi orang ngelaku diri deka nyadi chalun Barisan Nasional (BN) di penuduk Parlimen Santubong ba Pengawa Bepilih Besai Ke-14(PRU14).

    Iya beratika orang ti ngelaku diri nya ukai pemar ke besai ketegal pengawa be baka nya suah nyadi tetiap kali maya pengawa bepilih.

    “Ba aku pekara nya enda mai penanggul ke besai ketegal kitai ngemeranka sistem demokrasi.

    “Tajapia semua pemutus dilempaika ba ketuai renggat tinggi BN, sekalika deka ngenanka penyandang tauka nyabung chalun baru.

    “Aku ngasai ba tetiap penuduk sigi bisi orang ti deka nyadi kaban parlimen nganti penyandang, pekara tu suah nyadi,’ku iya.

    Iya mansutka jaku nya ngagai pengarang berita pengudah ngulu Pengawa Nyuaka Bantu Penusah Ngenyit MP Santubong.

    Ba pengawa nya Wan Junaidi ke mega MP Santubong nyuaka bantu ba penyampau RM28,100 ngagai 54 iku penerima di Palan Servis MP Santubong ditu, kemari.

    Wan Junaidi nambah, ulah ngelaku diri di Semenanjung Malaysia balat agi enti dibanding enggau di Sarawak laban mayuh penuduk dikerebut nyengkaum penuduk ke dikuasa penyakal.

    Ku iya, pengelama udah nyadi MP, iya enda kala meri semaya ti udah ulih dikeamat.

    “Tetiap pemutus ke digaga seruran beratka pemaik rayat lalu aku enda kala dulu beratka ruang bilik tauka kroni ba sentang projek,”tandu Wan Junaidi.

    Dulu agi ba jaku iya madah umur enda nyadika penanggul ba atur ngemujur tanggungpengawa nyadi pengari rayat.

    Aku ba umur diatu ulih gawa 12 nyentuk ngagai 14 jam sehari. Pengerai tubuh aku ba ikas ke manah lalu ulih gawa enggau manah, tandu iya.

    Bela datai bini Wan Junaidi, Datin Sri Feona Wan Junaidi enggau orang bukai. #UtusanBorneo

    No comments

    Post Top Ad