Header Ads

  • Berita Tebaru

    Pengawa bepilih parti besai PBB deka digaga kena 8 - 11 Februari tu

    MEKUHKA EKONOMI DIGITAL: Bala ketuai PPB baru diuluka Abang Zohari (lima kiba) ngulihka mandat parti dikena ngepunka ubah enggau pejalai ekonomi digital Sarawak.
    MIRI: Semua mata deka beratika nama chalun ungkup dua pangku pengawa mandal presiden kanan enggau empat pangku pengawa mandal presiden sereta bala kaban kaunsil parti Barisan Nasional (BN) Sarawak, Pesaka Bumiputera Bersatu (PBB).

    Tu nyadi pengepun baka ni gaya pengawa bepilih parti besai ti deka datai deka ditempa maya konvensyen kena 8 ngagai 11 Febuari tu, lalu bala kaban parti renggat baruh enggau pemerati politik deka meda asil penembu ba Aum Besai Tiga Taun Sekali (TGM) keterubah, pengudah jeman Taib, ti nyadi ketuai kedua megai tanggungpengawa.

    Pekara pemadu narit perati ngagai tiga iku ketuai dalam hierarki politik deka datai ke mua.

    PBB, begulaika parti politik PESAKA enggau Bumiputera dalam taun 1973, majak tumbuh tegap nyadi tulang belakang BN, parti merintah Sarawak sereta penguasa raya dalam rampa nasional.

    Hari bulan kepenudi nganjung chalun Hari Lima tu deka nyadi buah randau rintai sida ti disagam maya pengawa bepilih parti tembu lalu presiden parti, Datuk Patinggi Abang Abdul Rahman Zohari Tun Openg, dikelala agi enggau nama gerila.

    Nitih ku chairman mendam enggau Speaker DUN, Datuk Amang Mohd Asfia Awang Nassar, pengawa nganjung nama bepilih parti deka ditutup urung pukul 2 lemai kena 1 Febuari, lalu bala komiti udah nya deka ngelis pandak agi nama chalun lalu sedia ngaga lis nama kena 2 Febuari.

    Tiga pangku pengawa tetinggi – presiden enggau dua sapit presiden baka enda deka diperebut laban dipesetuju bala kaban kaunsil supreme, begulai enggau Ketuai Indu enggau Ketuai Nembiak ti terus dipadu nyadi mandal presiden.

    Awak dibuka ngagai pangku pengawa mandal presiden kanan (SVP) ungkup pampang PESAKA enggau Bumiputera, berindik ari niki hierarki penyandang Datuk Amar Douglas Uggah enggau Datuk Amar Awang Tengah Ali Hasan nyadi sapit presiden.

    Peragam chalun ditaga ulih menang (Bumiputera) iya nya Dato’ Sri Fadillah Yusof, Ketuai Nembiak enggau Menteri Kereja Raya Malaysia, Datuk Abdul Karim Rahman Hamzah, kaban kaunsil supreme enggau ketuai bisi kaul rat enggau kepala menteri sereta presiden parti.

    Ba atas keretas, pengawa narit diri barang siku ari bepilih tau mai menang di darat ngagai orang bukai maya TGM parti di Kuching kena 8 ngagai 11 Febuari tu. Fadillah tau megai pangku pengawa tetinggi enggau nyadi menteri tang Karim pegari nyadi kaban kaunsil supreme sereta ex-sapit ketuai nembiak ti majak angkat kenyau ari dua taun ke udah.

    Ba chalun ditaga ulih megai SVP (PESAKA) iya nya penyandang mandal presiden Datuk Micheal Manyin Jawong enggau Datuk Alexander Nanta Linggi sereta Sekretari Besai Datuk Dr Stephen Rundi Utom.

    Enti sema pemuang enggau sepenemu patut diperunding, Manyin nyangka ulih diaku lalu tau nyadi bagi status ngagai Alexander enggau Dr Rundi, tang nyangka tau nyadi besilih portfolio ngagai PESAKA berindik ari pemindah Douglas, deka disebut ila. Taja pia, undi deligit enggau raban ukai ketegal pengelama deka nyadi pun penentu pengawa bepilih parti.

    Semua deka nganti pengawa bepilih empat pangku pengawa mandal presiden sereta kaban kaunsil supreme, ke alai bala pengarai zon, penatai asal raban etnik, konsesus enggau pegai politik chalun, semua tu bisi diperunding.

    Ba pengawa bepilih parti dalam taun 2013, enam chalun Bumiputera ungkup pangku pengawa njya udah dimenang Datuk Haji Wahab Aziz, Datuk Haji Talip Zulpilip enggau Datuk Julaihi Narawi. Bisi berita ngerimbas pending ti ulih dipechaya dalam politik madahka sekali tu nyangka mayuh agi berebutka empat pangku pengawa ke puang nya.

    Ba raban PESAKA, bisi tiga chalun ungkup dua pangku pengawa ke bisi.

    Penyandang Sapit Ketuai Nembiak, Gerald Rentap Jabu enggau Sapit Ketuai Indu Datuk Fatimah Abdullah dipelaba deka mansang ngetuaika sayap sida empu ungkup penggal ke baru pengudah penyandang bela minta enda beplilih baru.

    Pemutus deka ngayanka tusun baru pegai politik dalam parti nengah raban Nembiak, Indu enggau raban besai PBB laban iya ngejangka diri ari jeman pegai Taib.

    Taib megai pangku pengawa presiden parti pengelama 33 taun pengudah ngemaduka diri nyadi Kepala Menteri Sarawak kena 28 Febuari 2014, meri jalai ngagai Special Functions Minister di Opis Kepala Menteri, Adenan Satem nyilih iya.

    Adenan midang kena 12 Januari 2017 sebedau iya ulih ngatur TGM parti, dilanjar kena nyediaka diri napi Pengawa Bepilih Nengeri (PRN) dalam bulan Mei 2016, lalu penganti iya, Datuk Patinggi Abang Abdul Rahman Zohari Tun Openg, nampung pengawa ti ditinggalka niang.

    Konvensyen parti deka diatur kena 8 ngagai 11 Febuari taun tu di BCCK, enggau ubah nengah pengawa bepilih parti sebedau napi pengawa bepilih besai ti deka datai, deka diatur abis laun sebedau bulan Ogos, lalu tu keterubah iya pengudah jeman Taib.

    Presiden PBB ke lalu nyadi chairman BN Sarawak, sereta Taib suah udah teulihka pemutus ti manah tetiap kali pengawa bepilih besai ungkup BN nasional ngagai perintah kenyau ari iya megai pangku pengawa dalam taun 1980. Iya ninggalka penuduk tegap diisi Abang Johari, pangku pengawa nyadi juragan baru ti deka mantaika penau iya gawa.

    Iya rindu meda ubah seraya ngemeranka transisyen ketuai gawaka parti mansang ke mua ngagai pekara ti deka ditempa baka Jeman Industri 4.0, enggau siti juluk besai napi Pengawa Bepilih Besai Ke-14 (PRU14) keterubah iya lebuh nyadi Kepala Menteri, Presiden PBB sereta Chairman BN Sarawak.

    Sarawak dipelaba sekali agi de-ka meri mandat besai. Menteri besai enggau pemesai lumur sa-tu BN Nasional, Dato Seri Najib Razak ngelempaika pangandal ngagai PBB enggau Sarawak u-lih menang maya PRU14 tu. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: