Header Ads

  • Berita Tebaru

    Pengawa komiti teknikal mansik sistem parit enggau entali ai

    BAUM: Lee (duduk, kanan) enggau Chok (duduk, kiba) begulai enggau Sebastian (kanan), Adam (bediri, dua kanan) enggau bala bukai bela beratika kar menua ti dituntung penusah ampuh bah.
    Penumbuh komiti tu deka betuaika JPS ti dikena nentuka pun penusah ampuh bah ti nyadi di sekeda kandang menua.

    MIRI: Siti komiti teknikal ditumbuh khas ti betuaika Opis Parit enggau Entali Ai (JPS) ngambi bejalaika pansik ba semua pekara lalu ngelangkar pelin besai bekaul enggau sistem parit enggau entali ai di tiga kandang menua dituntung penusah ampuh bah ditu.

    Menteri Muda Dagang Temuai, Seni enggau Main Asal, Datuk Lee Kim Shin madahka komiti nya ti diketuaika Direktor JPS Sarawak empu, Chok Moi Soon, deka ngelala pun penusah ampuh bah ti udah nyadi di sekeda endur ditu kelebih agi di Eco Park, Taman Tunku enggau Tukau.

    Ujan bangat semanjai malam Hari Satu tadi ngujungka ampuh bah balat nyadi di kededua genturung pendiau nya lalu Sekula Primari Bansa China (SJK) (C) Tukau, Miri ditu, ngujungka 159 iku nembiak dipindah ngagai endur likun lalu sekula ditutup tumu sehari nya.

    Ku iya, komiti tu mega deka ngiga jalai mutar timpuh panjai enggau mansik semua kandang menua nya, ukai semina ba sistem parit aja, tang mega mungkur pelin besai ungkup kandang menua nya dikena nangkup peminta pemansang ti dipelaba majak nambah.

    “Kebuah pia, dudi hari deka mayuh agi begunan enggau pemansang deka dipejalai di kandang menua nya, nya alai, iya begunaka sistem parit ti meruan agi dikena nyeliahka sebarang penusah bah nyadi baru jemah,” ku iya.

    “Kitai dekaka pemansang ti dipejalai ngemai perengka guna enggau pengelantang ngagai peranak dia lalu ukai nya ngemai penanggul ngagai sida,” ku iya nambah.

    Lee mansutka jaku nya rambau aum pengarang berita ditu kilah ensana, pengudah ngulu aum khas berandauka pekara bekaul enggau penusah ampuh bah ti nyadi ba beberapa endur ditu kena Hari Satu kelebih agi di tiga endur nya.

    Ku iya, tuju aum kemari ti digulu JPS Miri, Opis Kereja Raya (JKR) Bagi Menua, Opis Tanah enggau Survei (JTS) sereta Majlis Bandaraya Miri (MBM) ngiga jalai dikena mutar timpuh pandak ba penusah bah tunggal ke nyadi di Eco Park, Taman Tunku enggau SJK (C) Tukau.

    Ku Lee, kelimpah ari ngerumban mutarka penusah nya (ungkup timpuh pandak) baka meresi parit enggau pegung nakung ai bah, iya mega ngerah raban MBM berandau enggau bala pemaju di kandang menua nya nentuka kereja berumah sida enda nekul sistem parit ti tau ngujungka penusah bah tau nyadi tetiap kali musim ujan.

    “Ditu aku sekali agi nandu, enti sida deka bejalaika pemansang, bala pemaju patut nentuka pemansang ti dipejalai enda ngenataika penanggul bah tunggal lalu nekul tauka nating peranak ke diau ditu.

    “Ambika chunto, sida tau ngaga enggau nembuka sistem parit dulu agi sebedau ngaga baru dikena nyeliahka penusah bah lalu nentuka sistem parut seruran lanchar,” ku iya seraya minta kerejasama ari raban pemaju.

    “Aku dipadah ari rikod diambi ari Stesyen Ujan di Padang Bilun Miri kemari (Hari Satu) nunjukka taburan ujan penyampau 161mm iya nya tinggi agi dibida dua taun ke udah (120mm), meda ampuh bah balat agi nyadi di genturung Eco Park.

    “Taburan pemadu tinggi dirikod dalam pengelama sejam (Hari Satu) iya nya antara pukul 6 ngagai 7 pagi iya nya 47mm enggau antara pukul 9 ngagai 10 pagi iya nya 42.5mm,” ku iya seraya nambah, taburan ti tinggi nya ngujungka bah tunggal mangka ketetiga genturung pendiau nya, tang agi ulih diputar.

    Rambau aum pengarang berita ke sama, ku Chok, sida deka gawa meresi sistem parit ti tepekul ba dia kelimpah meresi pegung nakung bah, pengawa dirumban sida dalam timpuh pandak.

    “Ungkup timpuh panjai, kami deka dulu agi mansik silik semua kandang menua sebedau mantaika pelin besai enggau konsep tegap,” ku iya nambah.

    Sama bisi datai rambau aum pengarang berita nya Kaban Kunsil Nengeri (ADUN) Piasau, Datuk Sebastian Ting sereta Datuk Bandar Miri, Adam Yii.

    Sida udah nya ngabas ngagai endur ti dituntung penusah ampuh bah. #UtusanBorneo

    No comments

    Post Top Ad