Pengerami hari besai pelasar ngemujurka gagasan 1 Malaysia - Berita Iban Online

Header Ads

  • Baru Nyadi

    Pengerami hari besai pelasar ngemujurka gagasan 1 Malaysia

    Datuk Francis Harden Hollis
    Pengawa ngabang ngagai pangan diri maya ngintu pengerami hari besai dikena ngerapitka kaul sereta betukar penemu.

    SRI AMAN: Menteri Muda Pengelantang Komuniti Sarawak, Datuk Francis Harden Hollis dekaka tetiap hari besai diintu pupu bansa di menua tu nyadi pelasar ngemujurka gagasan 1 Malaysia ti ditibak ari penemu Menteri Besai sebedau tu.

    Nitih ku iya, endang patut hari besai diintu peranak Malaysia nadai ngira di Sarawak tauka di Sabah enggau Semenanjung Malaysia lalu diintu begulai semua bansa.

    “Udah nyadi pengawa komuniti kitai kelebih agi di Sarawak tetiap kali ngintu hari besai, kitai deka ngabang ngagai kaban belayan enggau bala bakih, sida ke diau dampih enggau pangan diri nadai ngira penuduk, pangkat enggau jalai pengarap, kitai tu sama dalam 1 Malaysia,” ku iya.

    Iya ke mega Kaban Kunsil Nengeri (ADUN) Simanggang mansutka jaku nya pengudah ngulu Pengerami Nerima Pengabang Ketuai Raban Bansa China, Kapitan Tay Siaw Chuan di Sri Aman semak ditu.

    Ku Harden, pengawa begusung pangan diri endang pengawa ti nyelai lalu patut ditampung dikena nyamin penyerakup ti ngemai pengelantang ngagai rayat pupu bansa.

    “Penyerakup rayat pupu bansa di nengeri endang beguna endar dikena kitai mansang ke mua. Baka udah ditemu semua kitai, nengeri Sarawak, kitai bisi mayuh bansa diau di selampur nengeri.

    “Ngelama tu, kitai diau likun enggau lantang, kitai bebasaka pangan diri, jalai pengarap, main asal, adat lama bansa bukai. Pia mega, kitai ngasaika nadai penyarut bansa nyadi baka di menua bukai. Nya alai, nengeri enggau menua kitai patut ngemeranka gaya idup baka tu,” ku iya.

    Nya kebuah ku iya, rayat patut meri terima kasih ngagai perintah Barisan Nasional (BN) laban bisi polisi ti manah endar ungkup pupu bansa. Perintah BN endang enda bechiping ba semua polisi enggau perambu pemansang iya.

    “Semua bansa, mit tauka besai, semua diberi awak ke sebala lalu aku ngarapka, penyerakup rayat diasaika kitai kemaya hari ukai datai baka nya aja, bala ketuai politik, ketuai raban bansa ke dulu suba, endang bebendar gawa, berandau sereta berunding, ngambika penyerakup meruan bisi ungkup semua di nengeri tu.

    “Kaul ari semua opis, ejensi perintah enggau gempung ukai dikuasa perintah (NGO) deka gawa ngatur aktiviti ngemai beserakup di menua tu endang dikenang,” ku iya.

    Sama bisi datai Ketuai Indu SUPP Simanggang, Ling Siew Hung, Sapit Chairman Kaunsil Pelilih Sri Aman, kaunselor Andar Suntai sereta bala kaban SUPP Simanggang ke bukai.

    Rambau pejalai nya, Harden enggau sida sebuat bisi ngabang ngagai Pengerami Nerima Pengabang di rumah Kapitan Kiew Siew Ted enggau Chairman Serakup Klan Lim Bagi Menua Sri Aman, Ling Yu Kong. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads