Penuduk Mandal Presiden PBB dikerebut tujuh chalun - Berita Iban Online

Header Ads

  • Baru Nyadi

    Penuduk Mandal Presiden PBB dikerebut tujuh chalun

    Datuk Amar Mohamad Asfia Awang Nassar
    KUCHING: Tujuh ketuai dalam Parti Pesaka Bumiputera Bersatu (PBB) pampang Bumiputera deka bediri minta pilih ngerebut empat penuduk Mandal Presiden rambau Aum Besai Tiga Taun Sekali (TGA) PBB berengkah 9 nyentuk 11 Februari tu.

    Chairman Pengawa Bepilih PBB Datuk Amar Mohamad Asfia Awang Nassar madahka komiti nerima tujuh chalun ungkup penuduk nya kemari, iya nya hari ke penudi endur nganjung pom chalun.

    “Tujuh iku sida iya nya Dr Abdul Rahman Junaidi (ADUN Pantai Damai), Datuk Abdul Karim Rahman Hamzah (ADUN Asajaya), Datuk Talib Zulpilip (ADUN Jepak), Datuk Julaihi Narawi (ADUN Sebuyau), Dr Annuar Rapaee (ADUN Nangka), Len Talif Salleh (ADUN Belawai) enggau Abdul Rahman Ismail (ADUN Bukit Kota).

    “Tebal agi rintai ketuai ke ngerebut penuduk mandal presiden mangku pengawa nyadi menteri muda,”ku Asfia ba aum pengarang berita di Indu Opis PBB Jalai Bako ditu, kemari.

    Tajapia Asfia madah pekara nya bedau putus lalu engka bisi ubah ba rintai chlaun maya hari bepilih (10 Februari).

    Iya nambah ungkup tiga penuduk Mandal Presiden ngarika pampang PESAKA, komiti nerima tiga chalun.

    “Ungkup pampang PESAKA, komiti nerima tiga chalun ungkup tiga penuduk mandal presiden ngarika PESAKA.

    “Reti nya nadai atur bepilih lalu ketetiga sida iya nya Datu Dr Stephen Rundi (ADUN Kemena), Datuk Roland Sagah (ADUN Tarat) enggau Dato Gerawat Gala (ADUN Mulu),’ku iya.

    Semua penuduk ‘Ahli Majlis Tinggi’ ngarika pampang Bumiputera enggau PESAKA mega enda diperebut, tandu Asfia ke nyadi Chairman Tetap PBB.

    Ngenang kaul ke sama, Asfia madah semua 82 pampang PBB milih Datuk Patinggi Abang Johari Tun Openg nyadi presiden PBB.

    Kelimpah ari nya ku iya, semua 82 pampang mega milih Dato Sri Fadillah Yusuf (MP Petra Jaya) enggau Dato Sri Micheal Manyin (ADUN Tebedu) nyadi Mandal Kanan Presiden ngarika Bumiputera enggau PESAKA.

    Ba sentang Bagi Orang Indu PBB, Asfia madah komiti nerima siku chalun ari 82 pampang ungkup penuduk ketuai orang Indu iya nya Datuk Sri Fatimah Abdullah.

    “Ungkup sapit ketuai bagi Orang Indu pan nadai atur bepekit ke alai Datuk Rohani Karim (MP Batang lupar) enggau Datin Angelina Celestine Ujang ngarika Bumiputera enggau PESAKA dipilih.

    “Pia mega ba penuduk mandal ketuai Bagi Orang Indu, Dato Sri Nancy Shukri (MP Batang Sadong) dipilih 82 pampang ngarika Bumiputera lalu Datuk Catherine Gramong ngarika PESAKA,’ku Asfia.

    Ungkup Ketuai bagi Nembiak PBB Asfia madah komiti nerima siku nama chalun, iya nya ADUN Layar Gerald Rentap Jabu.

    ADUN Serembu Miro Semuh ari PESAKA enggau ADUN Tupong Fazzrudin Abdul Rahman ari Bumiputera deka nyadi sapit ketuai.

    Ungkup penuduk Mandal Ketuai Bagi Nembiak semua 82 pampang milih ADUN Aidel Lariwoo (Bumiputera), Leonard Jabu (kuota PESAKA Iban) enggau Richard Silos (Orang Ulu).

    Asfia madah, PBB mujur nentuka nadai atur bepilih ba nyauka semua penuduk, ketegal raban dalam parti meretika guna berakup ba semua pengawa.

    Ku iya, raban dalam parti seruran meri awak ngagai sida ke patut lalu tu mih ke suah dikemeran dalam PBB. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads