Perengka guna lumba di Sungai Asap patut digaga menyana agi - Berita Iban Online

Header Ads

  • Baru Nyadi

    Perengka guna lumba di Sungai Asap patut digaga menyana agi

    Hemang Yu Abit
    KUCHING: Raban Nembiak di Sungai Asap begunaka perengka guna lumba ti menyana agi ukai semina ungkup gaya idup bepengerai aja tang dikena nempa mayuh agi atlit bekualiti sereta ulih nyadi jaguh lumba dudi hari datai ari kandang menua nya.

    Ketuai Nembiak Parti Rakyat Sarawak (PRS) Bagi Menua Murum, Hemang Yu Abit, ngansak perintah besai kelebih agi Opis Menteri Nembiak enggau Lumba jampat agi ngagihka belanja dikena ngaga begunan Stadium Tertutup di Sungai Asap.

    “Raban nembiak patut diperansang ngambi bagi ba mayuh aktiviti lumba tang baka ni kitai deka ulih ngereja iya lebuh kurang dalam perengka guna.

    “Tambah mega, tu deka nyaup raban bekaul mutarka isu rama ngagai raban nembiak. Sida tu suah agi nadai ngembuan sebarang aktiviti bukai kelimpah ari duduk berandau di pak kupi bekenaka telefon sida,” ku iya.

    Iya nyemetak madahka penyampau penyalah enggau kes bekaul dadah ngaul raban nembiak di Sungai Asap niki kandang diatu mega bekaul enggau penanggul kurang perengka guna lumba di kandang menua nya ungkup raban nembiak, ngena jam sida memanah.

    “Kitai ngarapka perintah deka beratika penanggul tu lalu nyediaka rayat kitai enggau perengka guna ti patut dikena nyeliahka diri ari aktiviti enda manah,” ku iya nandu.

    Iya pechaya, ari pemisi Stadium Tertutup ti meruan, raban nembiak deka ngaul diri dalam lumba lalau sida ulih nempa mayuh agi atlit ti nyulut ditu, sereta mega nagang penau pansut ke bukai ari menua tu.

    Pia mega ku iya, ari pemisi Stadium Tertutup di Sungai Asap, chara berenggat ulih nempa diri empu nyadi palan latih ti meruan ngagai bala atlit ungkup komuniti menua pesisir.

    “Bala nembiak deka bisi palan ti meruan endur ngisi maya lepa sida, nyeliahka diri ari ngereja ulah enda menuku. Ngaul diri dalam lumba tauka aktiviti bepengerai deka nentuka raban nembiak bisi agi disiplin sereta ngemanahka pengandal ba diri empu,” ku iya nandu.

    Ku iya, pemisi mayuh agi perengka guna ke bansa nya deka nagang bala nembiak ari ngurung diri empu, terus masau jam ba pemerindang online.

    Perambu Hemang udah dibantaika Sekretari Nembiak PRS Murum, Bit Surang, ti sepenemu, ke alai patut bisi mayuh agi perengka guna lumba digaga di Sungai Asap berindik ari kandang menua nya tebilang udah nempa mayuh atlit ti nyulut ngagai nengeri enggau menua tu.

    “Ambika chunto, atlit pechut menua kitai, Jonathan Nyepa iya nya peranak asal ari Uma Badeng, Sungai Asap,” ku iya.

    Nyemetak madah raban nembiak patut idup gaya pengidup bepengerai, ku Bit, semua orang patut ngelimpangka awak diri sesais sereta chakah ngaul diri dalam lumba enggau aktiviti rekreasyen, sekalika ngaul diri nengah serakup tauka ngatika diri empu.

    “Aku ngarapka pengawa ngaga komplek lumba baka Stadium Tertutup di Sungai Asap tu, kitai deka ulih nerenakka budaya ke alai lumba beguna endar nhyadi sebagi ari gaya idup rayat.

    “Tu deka nempa budah lumba, meransang gaya idup ti regas ngagai rayat, kelebih agi rebak baru. Tu mega nyaup nerenakka penyerakup enggau pengelantang ngagai pupu bansa ditu,” ku iya.

    Pia mega ku iya, stadium ke bisi diatu udah kelalu tuai, seraya trak lumba, padang bol enggau perengka guna baka grandstand, agu, bilik nukar gari patut diangkatmanah sereta patut diintu memanah ari raban perintah.

    “Nadai orang nyaga enggau ngintu stadium. Padang bol suah nakung ai sereta luchak, lalu pagar patut dikemanah. Kami mega minta lampu di stadium ngambika iya ulih dikena malam hari.

    “Aku pechaya tu juluk perintah deka meda bala nembiak sekula kelebih agi raban nembiak ngambika regas, bepengerai sereta nadai ngaul diri ba ulah rama,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads