Perintah andalka serakup China ngaga aktiviti bekaul jalai pengarap enggau pelajar - Berita Iban Online

Header Ads

  • Baru Nyadi

    Perintah andalka serakup China ngaga aktiviti bekaul jalai pengarap enggau pelajar

    Datuk Dr. Sim Kui Hian
    SRI AMAN: Perintah endang bebendar nyukung aktiviti serakup China di nengeri tu sekalika ari sukut jalai pengarap tauka pelajar.

    Menteri Kaunsil Kandang Menua enggau Pengawa Berumah Sarawak, Datuk Dr. Sim Kui Hian madah bala pengari rayat di nengeri suah ngagihka belanja ngagai sekula bansa China enggau tepikung China.

    Nya kebuah ku iya, bansa China tebal agi ba pengawa dagang enggau bisi ekonomi teguh, patut begulai enggau perintah nentuka penegap politik enggau pemansang ekonomi ulih meruan dijaga pulaika pemaik begulai.

    Iya ke mega Presiden Parti Sa’ati Rayat Sarawak (SUPP) mansutka jaku nya lebuhka bejaku bejadika Pengerami Makai Lemai Mantar Taun Baru China 2018 enggau Pengawa Ngangkat Sumpah Kaban Komiti SUPP Pampang Simanggang enggau Lingga Sesi 2018-2010 diatur SUPP Pampang Simanggang bepalan di Balai Suarah malam ensana.

    Nitih ku iya, pengawa gerempung ngelama tu nyata ngayanka pengawa nangkup Konsep 1Malaysia enggau ngenegapka agi penyerakup enggau pengelantang rayat kelimpah iya mega nyapai konsep penyerakup dalam dagang nengah Konsep 1Malaysia ti ngemai rayat Malaysia patut beserakup enggau bebendar gawa ngemansangka ekonomi menua tu.

    “Ari nya, komuniti China ti bepengulih enggau bepenau dalam sektor dagang ulih mantu sida ti seranta nadai ngira bansa enggau jalai pengarap,” ku iya madah silik.

    Ku iya, pangku pengawa enggau tanggungpengawa sesebuah Gerempung Ukai Dikuasa Perintah (NGO) endang beguna endar gawaka sosio-ekonomi sereta meri penyedar ngagai bansa ba mayuh bengkah bidang nitihka juluk penumbuh serakup nya.

    “Bisi gerempung enggau raban gerempung serakup ditumbuh ungkup pemereti ati ba ekonomi lalu bisi mega dikena ngemansangka pekara rama enggau main asal. Pengelantang bala kaban gerempung mega patut diperati nentuka gerempung meruan tegap sereta dipebasaka bala kaban iya,” ku iya nambah silik.

    Sama bisi datai Sapit Menteri Dalam Menua ke lalu nyadi Kaban Parlimen (MP) Sri Aman, Datuk Masir Kujat, Menteri Muda Pengelantang Komuniti Sarawak ke nyadi Kaban Kunsil Nengeri (ADUN) Simanggang, Datuk Francis Harden ke mega Chairman SUPP Simanggang sereta bala kaban SUPP Simangang enggau Lingga. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads