Header Ads

  • Berita Tebaru

    Perintah Nengeri deka numbuhka model rumah chap Sarawak empu, ku Abang Johari

    BEJADI: Abang Johari ke udah bejadika Islamic Financial Products, Borneo Housing Mortgage Berhad nerima tepa ari (kiba)Abdul Aziz. — Gambar Muhd Rais Sanusi
    KUCHING: Perintah Nengeri deka numbuhka model rumah chap Sarawak empu, ti berega entara RM250,000 ngagai RM300,000 dikena meri peluang ngagai mensia mayuh ngambika ulih ngembuan rumah kediri empu.

    Kepala Menteri, Datuk Patinggi Abang Johari Tun Openg madahka nya laban nengeri enda ulih semina bepanggai ngagai chap rumah ari Kuala Lumpur.

    Ku iya sebengkah kandang endur baru ti ngemeranka rampa menua gadung deka dibuka endur ngemansangka chap rumah ti ngena model nengeri tu empu.

    “Aku bisi strategi iya nya deka numbuhka model rumah chap kitai empu lalu enggau kerejasama ari pemaju kitai ulih ngaga rumah sereta dijual nithka rega ke patut entara RM250,000 ngagai RM300,000 sebuah.

    “Aku deka numbuhka chap rumah tu dalam timpuh enam bulan, laban udah datai maya iya mensia mayuh ngembuan rumah moden ke ulih dibeli orang Sarawak.

    “Nambahka nya kitai deka ngaga rumah tu ba kandang endur ke bisi sistem perengka pengangkut ke manah, kitai engka ulih ngaga endur rumah ke baru ti enda jauh ari stesyen Transit Aliran Ringan (LRT) ke deka digaga ditu,” ku iya.

    Abang Johari mansutka pekara nya lebuh bejaku seraya bejadika Islamic Financial Products, Borneo Housing Mortgage Berhad (BHMB)ke diatur ba sebuah hotel ditu, kemari.

    Nitih ku iya model rumah nya deka pemesai urung 1,000 kaki persegi sereta bisi tiga bilik ke ulih dibeli rayat nengeri tu.

    Lebuh ti ngenang rega rumah diatu, iya madahka rumah Semi-D urung RM600,000 ba sekeda kandang endur sereta bisi manggai urung RM1 milion ba kandang endur premium, lalu nya nagang mensia mayuh ngembuan rumah ke diri empu.

    “Pemaju peribit patut ulih ngaga rumah ti medium rega sereta rumah tinggi rega. Ari tu kitai ulih nyaga rega rumah entara RM250,000 ngagai RM300,000,” ku iya.

    Kelimpah ari nya lebuh ti ngenang produk baru BHMB, Abang Johari madahka ngena produk enggau servis Kewangan Islam, Borneo Housing nyendiaka mayuh alternatif ngagai produk sereta servis bank konvensional, lalu nyendiaka mayuh agi pilih ngagai pemeli kelebih agi pemesai perintah menua.

    “Ari segi pengulih ngempu rumah, aku dipadahka Borneo Housing udah bejalaika lalau ari sukut pekara wang enggau jaga ari dalam dikena ngelindung pemeli rumah sereta kapasiti dikena nangkup pematut ba pekara wang ngambika enda tepuruk ba penusah wang ila,” ku iya.

    Sama bisi datai ba pengerami nya kemari, Menteri Muda E-Dagang Datuk Mohd Naroden Majais, Chairman Lembaga Pengarah BHMF Tan Sri Datuk Amar Abdul Aziz Husain enggau ke bukai. #UtusanBorneo

    No comments

    Post Top Ad