Header Ads

  • Berita Tebaru

    Perintah nyendiaka bantu pengelantang pendiau ampuh bah ti pemadu manah

    PALAN PENGENDUH: Entara sida ke dipindah ngagai Palan Pengenduh Enda Lama Kompleks Sukan Asajaya ke diau ba palan peninduk ke bisi disediaka ba palan nya.
    ASAJAYA: Bantu pengelantang pendiau ampuh bah ti disediaka perintah ba palan pengenduh enda lama ke sekali tu ti pemadu manah diasaika orang ti tasah ke diau ba palan nya.

    Likam Tambi, 47, Chairman Komiti Pemansang enggau Pengelikun Genturung Pendiau (JKKK) Kampung Sampun Jugu madahka berapa kali udah betapi enggau penusah ampuh bah sereta dipindah ngagai palan pengenduh tang taun 2018 iya nya bantu pengelantang pendiau ke pemadu manah.

    Nitihku iya sebedau tu peranak ba Kampung Sampun Jugu sereta beberapa buah genturung pendiau ke besemak kala betapi enggau penusah ampuh bah besai ba taun 2009, 2011 lalu ke sekali tu taun 2018.

    “Ba aku empu, bekaul enggau pengelantang pendiau kami kena penusah ampuh bah lalu dipindahka ngagai palan pengenduh sementara tu, aku ngasaika bantu pengintu pengelantang pendiau ke diatu (2018) ti pemadu manah sereta lantang.

    “Ke sekali tu kami bisi disediaka khemah tauka palan peninduk ungkup tiap ruang bilik lalu bisi ke mimit tubuh nya siti palan peninduk dikunsi dua ruang bilik. Sebedau tu kami diau betabur nadai betusun manah,” ku Likam lebuh dikerandau Utusan Borneo, ba Palan Pengenduh Kompleks Sukan Asajaya, kemari.

    Bepelasarka tinjau Utusan Borneo ngagai Palan Pengenduh Kompleks Sukan Asajaya, 275 iku orang ti kena penusah ampuh bah ti mungkur 78 pintu bilik ari empat buah genturung pendiau, disediaka 54 khemah tauka palan peninduk ti meri pengelantang ngagai sida ba palan nya.

    Nambahka nya, pengawa beperesa pengerai mega bisi dipejalaika kelimpah ari raban Angkatan Pertahanan Awam Malaysia (APM), Jabatan Bomba dan Penyelamat Malaysia (JBPM), Raban Soldadu Malaysia (ATM), Opis Pengelantang Pendiau Raban Bansa (JKM), Polis DiRaja Malaysia (PDRM) enggau ke bukai ke sama ngenukuka pengelantang pendiau sida ke kena penusah ampuh bah ba palan nya.

    Berebak enggau tu Penghulu Dahlan Man, 56, ari Kampung Asajaya Ulu mega sepenemu madahka diri lantang ati laban bantu pengelantang pendiau  ke disediaka ba palan pengenduh nya chukup ngemuaska ati.

    Iya madahka semua ejensi ke bekaul ti mantu nya meri servis ti engkeman sereta bisi atur ke udah ditetapka.

    “Ari segi bantu ba palan tu, enti ngira ari semua sukut tauka pekara, ba aku semua bantu pengelantang pendiau ke disediaka ba palan pengenduh sementara tu endang chukup ngemuaska ati baka endur diau, bilik mandi, pemakai enggau ke bukai, semua chukup,” ku Dahlan.

    Lebuh ke ditanya bekaul enggau pengerugi ketegal penusah ampuh bah tu, Likam enggau Dahlan sepenemu madahka enda entu ulih diitung.

    Seduai iya madahka, laban ti bisi sejarah ampuh bah sebedau tu, sida iya endang udah nyikap diri tumu baka barang diengkah ba endur tinggi sereta dokumen beguna dibai belama enti maya musim pengujan ke diserumba enggau penyadi pasang besai.

    Kelimpah ari nya lebuh ditanya kebuah sida ke selalu kena penusah ampuh bah, Likam enggau Dahlah madahka nya bepun ari sistem parit ke enda meruan.

    “Kami ngarapka piak ke bekaul ulih mutarka penanggul tu ngambika penusah ampuh bah tu ulih diseliahka.

    “Kami minta piak ti bekaul baka Opis Parit enggau Entali Ai (DID) ulih ngemesaika sistem parit, nyengkaum nambahka peninggi ban sereta engkelebat patut digagaka penutup,” ku Likam madahka pekara nya udah dikenataika ngagai piak DID.

    BERIPAI: Sida ti kena penusah ampuh bah ke dipindah ngagai palan nya beripai maya bebasu changkir kelimpah ari bebela pemakai.

    Bekaul enggau pengawa berapi, Ida Semeli, 53, ari Kampung Sampun Jugu lebuh dikerandau Utusan Borneo madahka, pengawa berapi nya dipejalaika ngena chara beripai enggau ATM.

    “Lebuh maya berapi, bisi empat iku ari tiap genturung pendiau deka mantu piak ATM bebela pemakai ke diberi ngagai semua kami ke diau ba palan pengenduh tu. Pia mega pemeresi ba palan tu mega dipejalaika kami ngena chara beripai,” ku Ida.

    Seiku indai ke baru udah beranak, Intan Nur Shazire, 21, ari Kampung Asajaya Tengah enggau anak iya ke baru 38 hari (kemari) sama dipindahka ngagai Palan pengenduh Sementara Kompleks Sukan Asajaya.

    Ku iya, keterubah iya enggau orang dipindahka ngagai palan pengenduh sementara, Intan madahka palan nya lantang sereta beresi.

    “Ditu enda mega kelalu tusah laban bisi disediaka servis beperesa pengerai, baka aku enggau anak aku ke baru ada bisi diperesa kelimpah ari anak aku ke diberi bantu pampers, semina ba aku ke bisi anak mit tu tbisi tusah mimit maya deka meri anak mandi laban nadai ai angat,” ku iya ke nyadi indai ngagai dua iku anak. #UtusanBorneo

    No comments

    Post Top Ad