Header Ads

  • Berita Tebaru

    Perintah patut nerang ngagai rayat status agih projek tekat bah RM30 juta

    Voon Shiak Ni
    MIRI: Perintah dipinta nerang ngagai rayat pasal status agih belanja ungkup projek tekat bah penyampau RM30 juta dikena mutar penanggul bah di Miri nitih udah dipadah dalam Langgur Pemansang Malaysia Lumpar Ke-11.

    Mandal Ketuai Indu Tetinggi PKR Voon Shiak Ni madah kelimpah penyampau nya, bisi mega penyampau RM2.4 juta agih belanja ari perintah besai enggau nengeri dikena bejalaika projek-proejk mit mutarka penanggul bah ba Miri.

    “Peranak Miri patut nemu sekalika agih belanja ke diberi udah dikena sereta sekalika projek tekat bah tu udah digaga tauka enda.

    “Nyema iya udah digaga, nama kebuah penanggul bah agi nyadi ‘mimpi jai’ ngagai peranak ke diatu ba sekeda endur ke suah kena bah lebih agi sida ke kena bah tunggal Hari Satu tu tadi,” ku iya.

    Iya madah munyi nya rambau aum pemberita ke diatur ba Indu Opis PKR di Miri ditu kemari.

    Bela datai, Kaban Parlimen Miri Dr Micheal Teo enggau Ketuai Nembiak Raban Nembiak Keadilan (AMK) Jeffery Mok.

    Ku iya madah mega, pekara tu udah dibai ngagai parlimen nengah Dr Micheal Teo ba aum kedua penggal kelima ba Dewan Rakyat taun nyin kemari.

    “Saut ke diterima iya nya projek taun nyin kemari dalam proses ngaga langkar lalu tinda dipelaba dibuka ujung taun 2017 lalu dijangka tembu taun 2020.

    “ Tang, bepelasarka jaku dipansutka Menteri Pengeraja Asal enggau Rampa Menua Datuk Seri Dr Wan Junaidi Tuanku Jaafar ba sebengkah surat kabar jaku Inggeris kena Januari 2016, iya nyelinting projek tekat bah Miri enggau agih belanja RM30 juta dipelaba tembu ujung taun 2016.

    “Penerang ni ke ulih dikearap?. Penerang ari Wan Junaidi tauka ari parlimen, taja penerang ari parlimen dipansut nengah opis menteri ke sebaka,” ku iya.

    Voon ku iya minta perintah lebih lurus bekaul enggau status agih belanja projek ke disedia ngambi enda napi sebarang penanggul lebuh diaudit Opis Audit Menua maya ujung taun ila. #UtusanBorneo

    No comments

    Post Top Ad