Perintah patut ngamat semaya, isu bekal ai beresi patut teputar, ku Roland - Berita Iban Online

Header Ads

  • Baru Nyadi

    Perintah patut ngamat semaya, isu bekal ai beresi patut teputar, ku Roland

    Chairman PKR Baram, Roland Engan
    MIRI: Parti Keadilan Rakyat (PKR) Baram dekaka perintah meri bekal ai paip ke menyana agi ngagai 30 buah rumah panjai di Puyut enggau Lubuk Nibong di Marudi baka ti udah suah disemaya ngagai rayat.

    Chairman PKR Baram, Roland Engan madah, bala pengari rayat enggau perintah meseti jampat agi mutarka pekara nya laban peranak rumah panjai tu berangkutka ai beresi ninting hari enggau minggu ari paip di pasar Marudi.

    “Peranak rumah panjai ngangkut ai ari paip di pasar Marudi taja pengari rayat suah udah besemaya deka meri bekal ai beresi ngagai peranak dia,” ku Roland pengudah ngabas endur di Marudi ke alai peranak rumah panjai ngangkut ai ari paip dia.

    Sama bisi datai rambau aum pengarang berita iya nya Sekretari PKR Baram Dennis Along, Menijar Kimpin PKR Baram Telang Usan, George Laeng enggau Ketuai Opis Operasyen PKR Baram, Numi Uding.

    Nitih ku Roland, penanggul tu balat nating rayat laban isu ai beresi lalu enda teputar sereta pekara bukai iya nya sambung jalai ngelawa pasar Marudi enggau kandang ngelingi bagi menua Baram.

    Ku iya, baka ti udah kala disebut iya rambau aum pengarang berita dulu ari tu, ke alai Baram patut diberi laban nyadi pelilih menua mayuh agih belanja ungkup penyikap perengka guna enggau infrastruktur baka jalai enggau ai udah digaga enggau jampat ungkup rayat.

    Ku Roland, peranak Marudi endang nganti sambung jalai nyengkaum jalai Miri-Marudi ke diatu benung digaga, jalai nyambung ari Marudi ngagai Taman Negara Mulu ti disambung ngagai Limbang.

    Berebak enggau nya, ku iya, jalai Mulu-Long Bedian ngagai Long Lama, iya nya sambung besai dikena nyungkak ekonomi enggau mansutka penatai pemisi ngagai peranak di Baram.

    “Dia diatu nadai dikena meransang pengerembai ekonomi lalu tu pekara dikeirauka rayat di Baram nyengkaum komuniti dagang ti dekaka sambung jalai kenyau ari 30 taun ke udah,” ku iya nyemetak nampung.

    Nya alai ku Roland, juluk kami ari Pakatan Harapan (PH) iya nya deka ngaga baru Baram ngena rambai jaku ‘Bina Semula Baram’, taja pia perintah endang patut bejalaika pengawa sida ngaga sambung jalai di Baram.

    Ku iya, penanggul ke bansa tu enda deka meransang ekonomi lalu kami ngansak perintah berengkah berundingka peminta rayat nyengkaum sambung jalai.

    Enti PH ngerampas penuduk maya Pengawa Bepilih Besai Ke-14 (PRU14) tu ba perintah besai, kami bisi perambu ungkup Baram, ku iya nambah.

    Ngelansa isu bukai, ku iya, perintah mega besemaya deka ngangkatmanahka tebing sungai Marudi ti nyentuk diatu nadai kelai pengawa udah dipejalaika dia.

    Ku iya, pengari rayat seruran besemaya rambau Regata tang nadai pengawa udah dipejalai dataika sehari tu pengudah ngabas tebing sungai.

    Ba lansa bukai, Sekretari PKR Baram Dennis Along ngansak Menteri Besai Malaysia Datuk Seri Najib Tun Razak badu agi besemaya ngagai Sarawak tang ngamatka semaya sereta ngereja pengawa sida nyengkaum MA63.

    “Keamatka semaya lalu gawa, enti sema sida gawa diatu, PH deka nadai utai keulih,” ku iya nambah seraya ngansak Najib ngamatka semaya ngagai Sarawak. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads