Perintah udah nyediaka mayuh macham bantu pelajar - Berita Iban Online

Header Ads

  • Baru Nyadi

    Perintah udah nyediaka mayuh macham bantu pelajar

    GAGA: Ahmad Lai (duduk, tiga kanan) begambar begulai enggau bala pengajar enggau nembiak SK Beraya ti dipeda gaga pengudah nerima bantu kantung sekula kemari.
    MIRI: Perintah seruran ngemeratka pekara pelajar enggau nyediaka bemacham bantu ti patut ngagai nembiak, kelebih agi di menua pesisir.

    Kaban Parlimen (MP) Sibuti, Datuk Ahmad Lai Bujang madahka tu dikena nentuka apai indai nadai penekul nganjung bala anak sida ngagai sekula taja dikumbai seranta tauka merinsa.

    “Perintah meretika bisi rayat enda tetangkupka belanja laban mayuh dipelanja, seranta enggau ke bukai, nya kebuah perintah keran mantu sida,” ku iya.

    Ahmad Lai mansutka jaku nya rambau Pengawa Nyuaka Kantung Sekula ari Yayasan Pelajaran MARA enggau Parti Pesaka Bumiputera Bersatu (PBB) di Sekula Primari (SK) Beraya kemari.

    Ku iya, apai indai enda patut berasai malu enggau pengurang sida tang ransing nganjung bala anak besekula ngambi nerima pelajar ti menyana.

    “Semina nengah pelajar aja ulih ngubah idup sida ngagai meruan agi. Bisi chunto apai indai ke dulu suba seranta tang bisi bala anak nyulut dalam pelajar sereta teulihka kereja ti menyana,” ku iya.

    Nya alai ku iya madah nyemetak, apai indai ti seranta enda ibuh berasai malu tang madahka penanggul sida ngagai Opis Pelajar tauka ejensi perintah.

    “Anang bedalihka pekara belanja nyadi penekul sida nganjung bala anak besekula, apai indai patut sedar perintah seruran bisi mantu sida,” ku iya.

    Ahmad Lai mega ngelalau bala nembiak ngenang jasa enggau pemanah budi apai indai enggau bala pengajar ti udah mayuh mantu sida dataika nemu macha enggau ngira.

    “Enti udah mujur dudi hari anang enda ingatka jasa apai indai enggau pengajar laban enti nadai sida, kitai enda deka nerima pelajar lalu nyadi orang ti menyana,” ku iya nerang.

    Berebak enggau nya, bisi 200 kantung sekula udah disadung di sitak Parlimen Sibuti nyengkaum 105 kantung ngagai nembiak Primari Satu ngagai Primari Enam di SK Beraya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads