Header Ads

  • Berita Tebaru

    Pesakit kes ketujuh rabies mengkang raya ba HUS

    Dato Seri Dr. Hilmi Yahaya
    KUCHING:  Kes ketujuh rabies, siku lelaki ke beumur 59 taun ari Jalai Batu Kawa-Matang ti dipasuk ke dalam wad Sepital Besai Sarawak (HUS) kena 25 Januari 2018 mengkang raya.

    Sapit Menteri Pengerai Malaysia, Dato Seri Dr. Hilmi Yahaya madah pesakit keenam rebies ke berubat di HUS ari bulan Ogos (taun siti nyin tadi, udah diasuh pulai, ensanus.

    Taja pia, iya madahka nembiak mit ke beumur tujuh taun nya, ari Kpg Kuala, Serian, tang agi gegaring sakit.

    “Nembiak mit nya agi sakit sereta enda ulih engkebut, lalu begunaka bantu orang bukai ngatur iya empu, enda  ulih enseput manah, lalu begunaka sukung ventilator ba timpuh ke panjai,” ku iya.

    Dr. Hilmi madah munyi nya lebuh bejaku ba aum pengarang berita pengudah ngulu  Pengerami Begulai enggau ALPH sereta PPKK Nengeri Sarawak (Zon Selatan) di sebuah hotel ditu ensanus

    “Orang ke kena gigit ukui gila, enda tau enda jampat ngagai klinik, sebedau nya tuchi dulu bakal ke kena gigit nya ngena ai beresi ke mayuh, lalu jampat nurun ke sepital/klinik,” ku iya.

    Berebak enggau nya Direktor Opis Pengerai Sarawak, Dr. Jamilah Hashim madah enti klinik peribit,nda tau enda nanya dulu ngagai sepital perintah tauka klinik perintah, laban sepital/klinik perintah bisi chukup vaksin .

    Naka kediatu ku iya, bisi sebuah klinik swasta ke udah nerima (warning letter) ari Opis Pengerai Sarawak (JKNS).

    “Bekaul enggau kes ke penudi endar ba taun 2017 (bulan November). Ari pansik kami, orang nya kala digigit ukui tang berubat ba klinik peribit tang klinik nya enda meri notis ngagai kami sereta enda madah ngagai sepital perintah.

    “Taja pan bekau abi gigit ukui nya gerai,dua, tiga hari udah nya, tang ba bulan Januari 2018 tu tadi, berengkah ngayanka simptom, ngujungka orang berubat baru ngagai sepital peribit, ke terus ngeripot kes nya ngagai sepital perintah,” ku iya.

    Dr. Jamilah madahka HUS enggau Opis Pengerai udah nganjung pemadah, nerang pasal chara mutarka kes kena gigit ukui gila ba bulan September 2017.

    “Nangkang nya, kami bisi ngagai nandu baru ngatur licha begulai enggau lutur klinik peribit, lalu berengkah bulan Januari tu kami (JKNS) deka meri jaku lalau baru ngagai semua klinik sereta sepital perintah enggau peribit.

    Bulan Januari tu, kami deka nulis surat baru ngelalau sida, lalu nyema pengawa nya nyadi baru (enda ngeripot kes rabies ngagai HUS tauka JKNS), sida deka diberi surat, ku iya.

    Sama bisi enggau ngulu aum media nya kemari, Menteri Opis Kandang Menua, enggau Pengawa Berumah, Datuk Dr. Sim Kui Hian enggau Sapit Kepala Direktor Opis Pengerai Malaysia, Dr. Azman Abu Bakar. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: