‘Pesta Penguman Asen’ nyadi pelasar manah dikena ngelakuka produk main asal Sarawak - Berita Iban Online

Header Ads

  • Baru Nyadi

    ‘Pesta Penguman Asen’ nyadi pelasar manah dikena ngelakuka produk main asal Sarawak

    MANAH TIMBAL: Maister (duduk, dua kiba) begulai enggau peranak Long Leng ke bukai mandangka tanda gaga meda festival nerima timbal ke manah ari bala temuai.
    LONG LAMA, BARAM: Pesta Penguman Asen (Festival Pemakai Menua) Telang Usan keterubah iya diatur ditu,berengkah ari 26 ngagai 27 Januari tu tadi nyenggala mujur nyadi pelasar manah endar ngagai pedagang nyual produk sida enggau ngelakuka main asal menua tu ngagai bala temuai ke datai ari semak enggau jauh.

    Diatur Opis Pelilih Telang Usan bekerejasama enggau sekeda opis perintah, ejensi perintah, gempung ukai dikuasa perintah (NGO), pengari rayat enggau sitak Telang Usan, festival ngaul lebih ari 10 pedagang ari mayuh bengkah genturung pendiau di pelilih Baram.

    Tuju iya dikena nyediaka pelasar ngagai pedagang ngelaku sereta nyual asil betanam ke bisi tauka produk kraf jari enggau nyungkak status ekonomi rama sereta mega ngemesaika dagang sida di menua tu enggau menua luar.

    Maister Lolee, 54 taun, ke mega ketuai genturung pendiau bansa Penan di Long Leng madahka ngaul diri dalam program nya endang muka mata lalu iya ngarapka mayuh agi awak dagang deka datai ngagai iya.

    “Produk kraf jari kitai endang 100 peratus digaga ari wi. Produk kraf jari nyadi pemansut besai ba pemakai pemisi kami lalu kami udah nyual produk tu datai di Miri.

    “Kami merambu deka nyual produk tu ngagai menua tasik tang bedau ulih tetemuka chara baka ni ngereja iya. Nya alai, kami deka minta perintah nengeri enggau ejensi bekaul bukai ngatur kus pekara dagang enggau ngatur aktiviti bekaul bukai di genturung pendiau kami di Long Leng sereta nyungkak ekonomi menua pesisir,” ku Maister madah ngagai The Borneo Post lebuhka dirandau di festival nya.

    Ku Maister nampung, festival tu nyadi endur manah endar ngagai iya enggau peranak ke bukai bejualka produk sida ngagai makit besai agi berindik ari timbal chukup manah diterima sida.

    “Aku nganti pengawa numbuhka Palan Ngumpul, Nginjin enggau Nungkus (CPPC) ditu di Long Lama baka ti udah dikemendarka Sapit Kepala Menteri Datuk Amar Douglas Uggah Embas dalam jaku bejadi iya dulu tadi.

    “Tu deka meri mayuh ubah ti manah laban kitai mega merambu deka ngeluarka mayuh macham bansa produk kraf jari dudi hari,” ku iya nambah.

    Spanski Steven ari Uma Akeh madahka pengerami nya endur iya ngelakuka produk ari genturung pendiau sida ngagai makit besai agi.

    “Festival tu pengawa ti manah dikena ngelakuka pengawa lama komuniti kitai di menua tu lalu aku temegah ati meda mayuh pengusung bisi ditu sehari tu, gagit ati belajarka mayuh agi pasal main asal kitai.

    “Kami nyual mayuh bansa pemakai asal nyengkaum rian enggau daun jabang sereta mega pemakai tebilang kami, puff rian,” ku Spanski nambah.

    Uma Akeh dipadu bulih gelar champion ‘The Most Delicious Durian’ enggau lumur du aba pekit ‘The Biggest Durian’ rambau atur festival nya.

    Siku peranak menua Bulgari ti semina deka dikelala enggau nama Sdravko, ti bedarat ngagai Long Lama ari Loagan Bunut madahka pengagit diri ngulu festival nya.

    “Aku berasai lantang endar ulih ngenataika diri kitu lalu betemu enggau komuniti menua pesisir di Long Lama. Rian datai ari sida ditu endang chukup nyamai.

    “Aku endang deka datai baru kitu ngasaika pengelantang berami ba festival tu,” ku Sdravko, ti bedarat pengelama empat jam ari Loagan Bunut ngagai Long Lama, ketegal semina deka ngambi bagi dalam festival tu.

    Ba penemu Jok Aran Jalong, 56 taun, pengusung bansa Kayan ari Long Laput, festival tu patut seruran diatur dudi hari laban iya udah nyata nyadi palan ti manah endar ngagai komuniti menua pesisir ngangkatka status ekonomi rama sida.

    “Festival tu chukup ngerinduka ati.

    “Kelimpah ari nyediaka pelasar ungkup pedagang ditu ngelaku sereta nyual produk sida, iya mega meri kami awak mantaika main asal enggau pengawa lama,” ku iya nambah.

    Long Laput udah dipadu bulih gelar champion ba pekit ‘The Biggest Durian’ rambau festival nya.

    Rambau festival dua hari berunggu, pengusung bayam mayuh bansa produk sereta ngambi bagi dalam aktiviti ti ngerinduka atu nyengkaum ‘Makan Durian Sepuasnya’ (Eat All the Durians That You Can) rambau aktiviti makai.

    Pesta Penguman Asen udah dipenyadi Menteri Betanam Betupi Moden, Tanah Adat enggau Pemansang Kandang Menua Datuk Amar Douglas Uggah Embas.

    Sama bisi datai rambau pengawa bejadika festival tu iya nya Menteri Muda Kaunsil Kandang Menua Datu Dr Penguang Manggil ke mega ADUN Marudi, Menteri Muda Betanam Betupi Dr Abdul Rahman Ismail Dr Abdul Rahman Ismail ke mega ADUN Bukit Kota, Menteri Muda Orang Indu, Ruang Bilik enggau Pemansang Anak Mit Rosey Yunus ke mega ADUN Bekenu, ADUN Mulu Datuk Gerawat Gala, Penyanding Penemu Pansik Sains Nengeri Datuk Patinggi Tan Sri Alfred Jabu Numpang, Residen Miri Sherrina Hussaini, Pemesai Pelilih Telang Usan Baru Tai ke lalu nyadi Chairman Pengatur Festival, Sekretari Politik Kepala Menteri Charles Balan Seling enggau Ketuai Tetinggi Raban Bansa Kayan Temenggong Elizabeth Deng sereta Ketuai Tetinggi Raban Bansa Kenyah Temenggong Joseph Ngau Lian. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads