Header Ads

  • Berita Tebaru

    Pilih perintah dikeandal ulih ngintu pengelantang rayat, ku Najib

    PILIH PERINTAH: Najib benung ngenataika jaku lalau nyerumba Gempuru Ninting Bulan Opis Menteri Besai ba Laman Perdana kemari.  #Bernama
    PUTRAJAYA:Taun 2018 endang beguna amat ngagai rayat laban ti deka ngaga pemutus milih piak ni dikeandal ulih ngatur menua, seruran ngintu pengelantang rayat lalu berarika pengidup dudi hari, ku Menteri Besai Datuk Seri Najib Tun Razak.

    Ba gempuru ninting bulan Opis Menteri Besai (JPM) ba Laman Perdana ditu kemari,Najib madah nya kebuah perintah begunaka semua pengereja pengawa perintah bejalaika pengawa ngatur menua enggau manah, efisyen sereta beintegriti ngambika semua inisiatif perintah datai ba jari rayat.

    “Tang enti nyema kitai ngembuan ulah diau diri tauka nambah penyarut lalu nadai jalai mutar tauka dikumbai ‘red tape’, tentu kitaienda ulih ngamatka juluk rayat,” ku iya rambau gempuru ninting bulan JPM keterubah ungkup taun tu. Gempuru bulan nyin kemari dikinsil laban gaya hari enda manah.

    Iya madah akudanji perintah ke diiring iya ungkup rayat digaga kena lima taun ke udah mujur nyapai 97.6 peratus pemujur lalu semua nya tentu enda ulih dipejalai enti nadai sukung sereta bantu raban pengereja pengawa perintah.

    “Siti kaul ke patut dijaga kitai sereta ditegapka agi laban pengereja pengawa perintah endang tulang belakang ke dikeandal kitai nyapai juluk besai ungkup Malaysia,” ku iya.

    Najib mega Menteri Wang madah udah mayuh pemujur dijapai menua lalu iya ke pemadu baru, Forum Ekonomi Dunya ti ngengkahka Malaysia nyadi menua Asia ke pemadu manah dalam Indek Pemansang Inklusif (IDI).

    Kenu ku iya, Malaysia maggai ba tikas penuduk lumur 13 di dunya lalu gegelik aja di Asia, nangkan nya China ba penuduk ke-25 enggau India lumur 62.

    Najib madah rega Ringgit mega tegap lalu ngelui tikas psikologi RM4 kena 5 tu tadi lalu nyadi entara mata duit ke ngerikod japai ke manah dunya.

    Ku iya, Chairman Komiti Sekuriti Datuk Seri Ranjit Ajit Singh madah penegap rega Ringgit nya asil ari penatai belanja ari menua luar laban ti udah arap ngagai polisi menua tu,tambah mega rega minyak udah niki.

    “Tu sentimen ke ulih dipeda kitai, lalu taun tu kitai deka bejalaika Bajet 2018 ke dipeda mungkur semua, bisi utai ungkup semua kita dalam bajet tu,” ku iya.

    Ngasaika 2018 endang taun ke pemadu manah, Najih madah iya enggau sapit iya Datuk Seri Dr Ahmad Zahid Hamidi deka bebendar agi gawa.

    “Taun nyin kemari endang Taun Ngenatai, taun tu iya nay Taun Pemujur lalu meda asil ke ngemegah,” ku iya. #Bernama

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: