Header Ads

  • Berita Tebaru

    Projek jalai ari Emart ke Stapok disadang tembu bulan April

    DIPELABA TEMBU BULAN APRIL:Fadillah meri penerang ngagai raban media bekaul enggau status pemadu baru projek ngaga jalai empat lurung ari bulatan Emart Matang ke Stapok, Batu Kawa, kemari
    KUCHING: Projek ngaga jalai empat lurung ari bulatan Emart Matang ke Stapok, Batu Kawa dipelabaka ulih dibuka ngagai mensia mayuh dalam bulan April 2018.

    Menteri Kerja Raya (JKR) Datuk Sri Fadillah Yusof ngarapka pengawa ngerusak nadai nyadi dikena ngenukuka projek nya tembu nitihka timpuh ti udah ditetap.

    Bekaul enggau projek ngaga jalai ari Emart ke Stapok, jematan udah tembu magang lalu diatu semina kereja nyambung jalai ba renggat ke penudi, ku iya.

    “Bepelasarka perambu, projek tu ulih ditembu ba bulan Mac tu lalu enti nadai penanggul, ulih dibuka ngagai mensia mayuh ba bulan April tu.

    “Semina aku bisi nerima ripot tadi madahka diatu bisi penanggul pengawa ngerusak iya nya besi dichuri. Aku ngarapka enda ngira sapa ulih matau pekara tu sereta ngarapka penanggul enchuri reta tengkira mensia mayuh enda nyadi agi laban projek tu ungkup mensia mayuh kelimpah ari penanggul ngerusak ulih ngelubahka projek sereta ngeruga pengelikun penguna jalai alun.

    “Taja pan projek tu bisi lubah ari ke ditimpuh tang enda balat, asal aja ba bulan April ulih dibukai ngagai mensia mayuh kitai pan udah gaga ati. Kitai semina deka matau semua sekalika nitihka spefikasi enggau standard ke udah ditetapka dalam sempekat tauka enda,” ku iya.

    Fadillah mansutka pekara nya ngagai raban pengarang berita lebuh ke ngabas palan Projek Ngaga Jalai Empat Lorong ari Emart ke Stapok, Batu Kawa ti nyengkaum sebuah jematan meraka Sungai Sarawak, kemari

    Perintah besai udah ngemendarka ungkup belanja sepenyampau RM145 juta ungkup projek nya ngambika nya ulih nyadi jalai alternatif dikena mutarka penanggul penyekut jalai setipak enggau pemansang di Matang, Petra Jaya enggau kandang endur ke ngelinggi.

    Entara skop projek iya nya ngaga enggau ngemanahka jalai belakin empat lorong dua hala piawai U5 sepemanjai 4.4 kilometer ari bulatan Emart di Matang ke Jalan Temenggong Tan Meng Chong enggau ngaga sebuah jematan meraka Sungai Sarawak.

    Dulu ari nya Fadillah bisi ngabas projek ngemanahka jalai ari Batu 10 ngagai Batu 15 ti sepemanjai 9.2 kilometer ba Jalan Kuching-Serian ti berega urung RM80 juta dipelabaka ulih tembu ba bulan Mei.

    Projek jalai batu 15, Jalai Kuching-Serian sebengkah projek dipatau opis menteri laban nya kena bungkur projek Pan Borneo Highway (PBH) tang dipejalaika nengah chara pemansang Opis Kereja Raya ke nyadi ejensi ke bejalaika projek nya.

    “Bepelasarka ripot tadi, projek nya ulih ditembu dalam bulan Mei sereta deka dibuka ngagai mensia mayuh maya Hari Gawai, iya nya ba bulan Jun tu,” ku iya seraya ngarapka audit pengelikun ulih mega dipejalaika.

    Kelimpah ari nya, lebuh ke ngenang pasal projek jalai baruh tanah ba Bulatan Abang Kipali Abang Akip, Fadillah madahka projek nya lubah ari ke udah ditetapka berindik ari gaya hari ke selalu ujan tambah mega pengawa ke dipejalaika iya nya ngerubak tanah sereta mayuh ai nakung.

    “Enti nitihka jadula ke disemaya, projek tu patut tembu ba bulan Februari tang bepelasarka gaya projek nya diatu dikearapka ulih ditembuka ujung bulan April sereta kitai ngarapka ulih ditembuka magang ba bulan Mei ti nyengkaum pemendar ari segi Certificate od Practical Conclusion enggau audit pengelikun ,” ku iya.

    Sama nyempulang iya ngabas projek nya kemari, Ketuai Projek Opis Kereja Raya Sarawak Pejabat Kandang Selatan, Ir. Vincent Tang Chok Khing enggau ke bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: