PRU14 : Majoriti chalun ari SUPP orang baru - Berita Iban Online

Header Ads

  • Baru Nyadi

    PRU14 : Majoriti chalun ari SUPP orang baru

    Datuk Sebastian Ting
    MIRI: Majoriti chalun disabung Parti Sa’ti Rayat Sarawak (SUPP) maya Pengawa Bepilih Besai (PRU) tu ila orang baru nyengkaum sida ari kaban senior parti nya.

    Sekretari besai parti ke lalu nyadi Kanan Kunsil Nengeri (ADUN) Piasau, Datuk Sebastian Ting madah, sebagi ari tujuh penuduk diperebut parti nya maya PRU Ke-14 ila deka nyabung orang baru lalu semina siku tauka dua penuduk aja ti ngetankan orang lama.

    “Kitai udah nganjung lis nama ngagai bala ketuai tetinggi Barisan Nasional (BN) ngembika diperunding lalu ngelempai pemutus kepenudi (sapa bagi chalun ti deka bediri minta pilih ngarika SUPP) ngagai sida.

    “Aku enda nemu baka ni sida ngaga pilih (chalun) tang udah nyata lis pandak udah dianjung lalu kitai nganti pemutus kepenudi sebedau mantaika iya ila,” ku iya nerang ngagai pengarang berita lebuhka dirandang di rumah iya ditu.

    Dulu agi ari nya, Sebastian bisi nerima beratus iku pengabang ti datai ngulu pengerami nerima pengabang nyerumba hari kedua ngintu Taun Baru China, ke diatur di rumah iya di Luak.

    Ditanya pasal chalun SUPP di penuduk Miri ila, Sebastian enggai ngelansa silik tang ngaku udah nganjung empat nama ngambi diperunding dikena ngerampas baru Parlimen Miri ari jari penyakal maya PRU14 tu.

    Siku ari empat chalun ti diberita lalu nyau tampak endar deka bediri minta pilih iya nya Datuk Bandar Miri, Adam Yii.

    Ngelansa pengawa nyediaka diri SUPP datai ba pengawa bepilih ti dipelaba deka diatur sebarang maya pengudah Taun Baru China, ku Sebastian, parti nya udah nyediaka diri kenyau ari taun 2016, ngerampas baru penuduk ti diperebutka iya.

    “Kitai udah gawa ngagai renggat menua kenyau ari 2016 dikena nyediaka diri lalu nyikap raban gawaka parti napi PRU tu ila seraya kitai udah sedia (napi PRU),” ku iya nambah.

    SUPP deka bediri di tujuh penuduk asal diempu sida iya nya Parlimen Bandar Kuching, Stampin, Serian, Sarikei, Sibu, Lanang enggau Miri.

    Taja pia, PRU ke-13 tu tadi meda SUPP alah besai pengudah alah di enam penuduk ti diarika sida, iya nya Parlimen Bandar Kuching, Stampin, Sarikei, Sibu, Lanang ti dimenang DAP lalu Miri (Parti Keadilan Rakyat - PKR).

    Semina siti aja penuduk dimenang iya nya Parlimen Serian, disandang Menteri Pengatur Pekereja Datuk Seri Richard Riot Jaem enggau majoriti pengundi iya Bumiputera.

    Ngelansa pasal pengerami Taun Baru China sekali tu, Sebastian mantaika pengaga diri laban mujur ngetanka pengelantang pupu bansa di menua tu ti diayanka nengah pengawa begusung tauka ngabang tetiap kali pengerami nerima pengabang diatur.

    “Aku ngarapka taun tu deka ngemai penyenang ti lebih agi ngagai menua enggau nengeri tu, kelimpah penyerakup bansa enggau pengelantang ulih ditan sereta meruan bisi ditanggam rayat di nengeri tu,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads