Pulaika baru penuduk Stampin ngagai BN - Berita Iban Online

Header Ads

  • Baru Nyadi

    Pulaika baru penuduk Stampin ngagai BN

    TEPA : Dr Sim nerima tepa ari Lo pengudah ngelancharka Kimpin Tagang Ngena Perengka Polisterin enggau Hari Nadai Kambut Plastik ba Emart Batu Kawa kemari. Bela bisi dipeda Penguang (kiba).
    KUCHING: Pengundi di Parlimen Stampin patut nentuka penuduk ba sitak nya ulih dipulaika baru ngagai Barisan Nasional (BN) maya Pengawa Bepilih Besai Ke-14 (PRU14) ila.

    Pekara nya dipansutka Menteri Kaunsil Kandang Menua enggau Pengawa Berumah Datuk Dr Sim Kui Hian ti madah, tu beguna amat dikena ngemuntangka agi pengawa ngatur pemansang ungkup peranak ba sitak nya.

    “Diatu sitak Parlimen Stampin semina bisi siti injin aja (pengari rakyat BN renggat perintah nengeri), enti kitai bisi dua injin, tentu pemansang ungkup sitak tu deka muntang agi lalu dikenatai ngagai perintah besai.

    “Nya kebuah, aku ngarapka peranak ba sitak tu ulih ngaga pilih ke betul ngambi kitai ditu ngembuan dua pengari rayat ti ngenataika hak kitai ba renggat Kunsil Nengeri enggau Parlimen,” ku iya.

    Iya madah munyi nya rambau bejaku ba pengawa bejadika Kimpin Nagang Ngena Kereban Tapau Polisterin enggau Hari Nadai Beg Plastik ba Emart Batu Kawa ditu kemari.

    Dr Sim ke mega Presiden Parti Sa’ati Rayat Sarawak (SUPP) nyemetak madah ba nengeri tu mega patut nentuka BN menang besai maya PRU14 ila.

    Kenu ku iya, ngembuan pengari rayat ke mayuh ba renggat Parlimen, nya deka ngenegapka agi sada rayat di nengeri tu.

    “Ambika chunto pengawa magi asil chukai diatu bepelasarka penyampau populasi peranak lalu Sarawak semina ngembuan urung 2.5 juta dibanding Semenanjung lebih 25 juta rayat.

    “Tentu pengawa ngungkupka asil ari chukai tu dipeda lebih ngagai  Semenanjung lalu nya kebuah mega kitai patut mayuh pengari rayat ba renggat Parlimen ngambi kitai ulih ngelengkas agi pemansang nengeri tu sereta nyapai enggau lebih muntang,” ku iya.

    Dulu ari nya, Dr Sim minta piak industri enggau pedagang ngubah pengawa ngena kambut plastik kelai nyukung kimpin nya.

    Kenu ku iya, enti nadai kerejasama ari piak industri enggau pedagang nyengkaum penguna empu, jukuk nya tentu tusah deka dijapai.

    Berebak enggau nya, Kaban Kunsil Nengeri (ADUN) Batu Kitang Lo Khere Chiang lebuh bejaku madah, kimpin nya diatur Kaunsil Mengeri Padawan (MPP) betuju ngurangka pangka ke enda manah ari perengka  polisterin enggau kambut plastik nya ngagai rampa menua.

    “Endang utai dikearapka aku deka meda kimpin tu meri penyedar enggau meri pemakai ngagai semua kitai lebih agi bala penguna enggau pedagang,” ku iya.

    Sama bisi datai Menteri Muda Kaunsil Kandang Menua Datu Dr Penguang Manggil, Residen Bagi Menua Kuching Ismail Hanis enggau Chairman PBB Batu Kawa Datuk Ahmad Ibrahim sereta temuai bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads