Header Ads

  • Berita Tebaru

    Raban pedagang patut nyaup orang tusah

    TERIMA KASIH: Fatimah (tengah) ke disempulang Pui (kiba) enggau Tay (dua kiba) berandau enggau siku penerima bantu ‘Sejambak Kasih’.
    Mayuh sebana madahka ekonomi kitai enda manah nyengkaum rega barang majak mar.

    KUCHING: Gerempung sereta orang dagang bela diperansang bela nyaup raban ti kurang pemisi kelimpah ke disaup perintah maya nyambut hari besai sesebengkah bansa.

    Menteri Pengelantang Pendiau, Komuniti, Orang Indu, Ruang Bilik enggau Pemansang Anak Mit, Dato Sri Fatimah Abdullah madah beratika ekonomi taun siti nyin tadi enda berapa manah, perintah mega minta gerempung sereta orang dagang sama bela mantu Perintah mantu sida ke kurang pemisi.

    “Ekonomi kitai enda berapa manah ari taun nyin tadi, mayuh orang sebana madahka ekonomi kitai enda manah nyengkaum rega barang majak mar.

    “Ba sida ke tusah, tu nyadi penanggul, tang taja pan gaya ekonomi enda berapa manah, kitai beratika orang dagang, gerempung sereta korporat majakka pengawa sida mantu orang bukai ke tusah, baik nya meri barang tauka bantu wang ringgit,” ku Fatimah.

    Iya madah munyi nya lebuh bejaku ngepunka atur pengawa ‘Sejambak Kasih’ beserimbai enggau Taun Baru Cina 2018 ti diatur ulih Kuching Heng Hua Seng Ing Tong ke bekerejasama enggau Opis Pengelantang Pendiau (JKM) Pelilih Menua Kuching di luar tepikong gerempung nya ditu, kemari ti bela digulu ulih urung seratus iku penerima.

    Iya madahka tu siti pengawa ke chukup manah, lalu ngarapka pengawa manah bansa tu deka dipajakka di Sarawak, ke tetap ingatka sida ke tusah, meskin seranta tauka napi penanggul dalam pengelantang pendiau sida iya.

    “Laban enti kitai ngasaika ekonomi kitai enda manah,bakani ku sida ke tusah? Ba sida ke tusah, pedis agi ba sida iya.

    “Baka nya mega enggau Perintah Nengeri kitai, lebuh maya hari besai sesebengkah bansa, baik nya Taun Baru China, Gawai Dayak tauka Hari Raya, nengah JKM, perintah meri bantu lebih ngagai penerima bantu ninting bulan.

    “Maya Taun Baru China, sida ke nyambut hari besai tu, diberi lebih RM100, kelimpah ari bantu bukai, Lalu baka nya mega maya Gawai Dayak tauka Hari Raya Aidilfitri,” ku iya, lalu ngelalau kitai patut beterima kasih ngagai Perintah Menua taja pan ekonomi enda berapa manah.

    Ku iya nandu baru, baik orang nya bepengarap Keristen, Islam, Buddhist, Hindu, kitai di Sarawak, kitai ngembuan pemereti ati ke sebaka, iya nya mantu sida ke begunaka bantu sereta tulung kitai.

    “Bantu orang ke napi penanggul taja pan ni baka gaya penusah orang nya, ngambika sida iya pan ngembuan pengelantang pendiau baka orang bukai, enda ngira pendiau sida iya, bansa, tauka pengarap.

    “Ngambika sida iya pan enda ngasaika diri empu enda dikeibuhka, seruran dikeingatka belama, kelebih agi lebuh maya nyambut hari besai,” ku iya.

    Sama bisi enggau ngulu pengawa nya kemari, Pemesai JKM Pelilih Menua Kuching, Norhayati Abd Rahman, siku orang dagang ari Miri, Tony Pui, Chairman Pengatur ari tepikong/gerempung Kuching Heng Hua Seng Ing Tong, enggau pemesai gerempung nya, Tay Soon Ann. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: