Header Ads

  • Berita Tebaru

    Raban PEDAS mujur datai di Sungai Anap taja mayuh pemar di rantau jalai

    KENANG: Pete (depan, tiga kanan) begulai enggau bala kaban PEDAS Bintulu, begambar nyadika pengingat lebuh ba rantau jalai ngagai Ulu Anap.
    MIRI: Nujah jalai batang Ulu Anap, penyauh 225 kilometer ari mengeri Bintulu ngelaban ujan enggau tanah luchak di sekeda endur, enda nekul raban Serakup Dayak Sarawak (PEDAS) nganjung bantu ngagai sida ti tasah angus di Rumah Mawang di Sungai Anap, Tatau.

    Pejalai urung lima ngagai enam jam pengelama bepanggai ba gaya hari nengah jalai batang Ulu Anap ke mega nyambung ngagai Nanga Merit di bagi menua Kapit.

    Tu pejalai ti mar lalu semina ulih ditengah entukar 4WD aja seraya jalai belakin semina berengkah ari pasar Tatau ngelawa Sangan-Bukit Kana penyauh 40km.

    Pejalai 120 km udah nya napatka rumah panjai di menua entigis iya nya di garis entara menua Pelilih Tatau (Bagi Menua Bintulu) enggau Bagi Menua Kapit, ditampung nengah jalai batang.

    “Pengawa nganjung bantu ngagai sida ti tasah angus iya nya pengawa volunteer lalu ngaul konvoi lima buah enturkar 4WD.

    “Semina 25 iku kaban serakup enggau raban volunteer ke bukai, taja mayuh bala deka nyereta pejalai tu,” ku Chairman PEDAS Bintulu, Pete Bujang, ti ngetuaika konvoi nya.

    BESAUP BERANGKUT: Bala pesereta konvoi disaup peranak dia ngangkut barang bantu sebedau ngelayang sungai ngena perau, napatka rumah panjai ti udah angus di tanah seberai.

    Antara bantu ke bisi dianjung baka barang pemakai, gari, perengka guna ke bukai, asil ari pupu bala kaban PEDAS enggau pemeri ari mensia mayuh enggau gempung ukai dikuasa (NGO) baka ari Serakup Iban Dayak (SID) Bintulu, Robin Nest Music Café; Guro Kuntau Spring iya nya Guro Menang Nyandang, penyanyi tebilang Iban, Dom Romeo sereta bala bukai ti sinuka penusah nya.

    “Bala sida ukai semina ngumpul pemeri ungkup sida ti tasah aja, tang mega bela begulai enggau bala kaban PEDAS nganjung bantu, nadai berasai sanggu jauh bejalai nengah jalai batang, ketegal penyinu,” ku iya.

    Jalai tanah kuing ti lichau ukai semina ngelubahka pejalai laban bisi maya entukar tempawah ngagai tisi jalai sereta lap, tang semua nya enda nekul pengeran sida nganjung bantu nya.

    Barang sapa ti agi deka nyuaka pemeri kelebih agi bantu mata duit dikena ngentak baru rumah panjai nya tau betanya ngagai Bija Mawang, anak Tuai Rumah (TR) Mawang ba lumur 0198440368.

    Pejalai bala sida mulaika diri ngagai Bintulu dua kali lipat pemar.

    “Kebuah pia, kami betapi enggau ujan bangat ba tengan jalai, ngujungka bisi tayar entukar bala kami lap dalam tanah luchak.

    “Taja pia, kami enda ngalahka semangat kami lebuh berundingka pemujur diri nganjung bantu ngagai sida ti begunaka bantu,” ku Pete.

    TEPAWAH: Penusah entukar tepawah nisi jalai ketegal jalai lichau.

    Pemar ti ditapi sepanjai pejalai berasai lantang lebuh tekenangka tuchum sida ti ngambat penatai kami, lalu pekara tu pemadu beguna laban kami deka sida nemu diri enda kala dikelaung lebuh betapi enggau penusah, tu mega tuju PEDAS,” ku iya nambah.

    Nitih ku Pete, iya berasai lantang semua sida sebuat likun datai di Bintulu lalu tu deka nyadi peransang ngagai sida mantu raban begunaka bantu kelebih agi bansa Dayak ke diau jauh di menua entigis.

    “Kami deka seruran bejalaika pengawa pengasih dudi hari lalu meri terima kasih ngagai sukung enggau saup ti diterima ari mayuh bengkah raban, kelebih agi kerejasama bala pesereta konvoi sekali tu.

    “Puji Tuhan lalu semina Iya aja ulih malas pemanah jasa semua kita,” tandu iya. #UtusanBorneo

    No comments

    Post Top Ad