Header Ads

  • Berita Tebaru

    Raban ti seranta enda kala dikemelu sida endang seruran diperati perintah

    Datuk Francis Harden Hollis
    SRI AMAN: Perintah nadai kala ngemeluka raban seranta tang sida tu mih ke seruran diperati, pia ku Menteri Muda Pengelantang Komuniti Sarawak, Datuk Francis Harden Hollis.

    Nitih ku iya, raban nya enda patut ngasaika diri dikemelu ari komuniti tang sida mega patut nerima hak sama baka komuniti bukai.

    “Nya alai, perintah berati sereta siruka sida tu lalu sida mega patut liat ati enggau kering semengat napi semua penusah sereta beridup baka komuniti bukai,” ku iya.

    Iya ke mega Kaban Kunsil Nengeri (ADUN) Simanggang mansutka jaku nya lebuhka bejaku ba Program Perlepasan Program Mini Kembara Sukarelawan Kebajikan Bahagian Sri Aman bepalan di Kompleks Penyayang, Opis Pengintu Pengelantang Mensia Mayuh (JKM) Sri Aman semak ditu, kemari.

    Ku iya nampung silik, sida tu enda patut berasai malu sereta ngelaungka diri ari bala komuniti tang sida patut ngaul diri begulai enggau bala komuniti diau besemak sida, lalu enda ngasaika diri bisi pengurang ba pengidup sida diatu.

    “Bala komuniti diau besemak mega patut meri sukung ngagai sida tu ngambika sida ngasaika diri dipebasa baka orang bukai,” ku iya nerang.

    Pia mega ku iya, bala komuniti mega patut besaup enggau perintah mantu raban nya sereta meri peransang ngagai sida ngambika sida ngasaika diri seruran dikenang sereta dikesiru.

    Sama bisi datai Pemesai Pengintu Pengelantang Bagi Menua Sri Aman, Awangku Mohd Najib sereta bala pemesai Kanan JKM Sri Aman ke bukai.

    Bisi 20 buah entukar udah ngaul diri dalam program kembara ke alai program tu udah dibagi ngagai dua raban iya nya Raban Keterubah ngagai sitak DUN Bukit Begunan iya nya di Rumah Gading, Ran Ulu, Sri Aman seraya Raban kedua ke DUN Lingga iya nya di Balai Komuniti Lingga. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: