Riot andal jaku jamin bekaul MA63 ngelantang ati rayat Sarawak - Berita Iban Online

Header Ads

  • Baru Nyadi

    Riot andal jaku jamin bekaul MA63 ngelantang ati rayat Sarawak

    SAIN DULU : Riot (duduk) nyain bup temuai seraya dikemata (ari kiba) Raymond, Bong, Jee, Chai enggau orang bukai.
    SERIAN:  Menteri Penguasa Pemayuh Pengereja Pengawa Dato Sri Richard Riot Jaem pechaya Menteri Besai (PM) Datuk Seri Najib Tun Razak udah ngelantang ati rayat Sarawak nengah jamin dia iya deka mulaika hak ke patut ungkup Sarawak bepelasarka Sempekat Malaysia 1963 (MA63).

    MP ke nguasa Serian pengelama enam renggat ke mega Sapit Presiden SUPP nya madah jamin ari Najib nya enda nyemaka semaya ke diberi raban penyakal.

    “Bisi bida ke besai entara jamin ke diberi Najib enti dibandingka jaku semaya ari raban penyakal.

    “PM orang ke megai kuasa, iya udah meri jamin deka mulaika kuasa ke patut ngagai Sarawak lalu ketegal nya pekara tu deka nyadi nyata.

    “Jauh bida enggau penyakal, sida nadai kuasa. Sida nemu diri enda ulih ngamatka semaya lalu ketegal ya sida majakka besemaya lalu nadai kiruh deka ngamatka semaya,’ku iya ba gempuru Taun Baru Cina di Kampung Muara Ahi, 35 km ari Serian malam ensanus.

    Riot mansutka jaku nya nimbal jaku Najib ba Gempuru Besai PBB ke-14 di Kuching Hari Enam tu tadi.

    Najib maya nya madah sedia mulaika kuasa enggau hak ngagai Sarawak ke udah diambi chara senagaja tauka enda sengaja.

    Ba pengerami nya Riot ngelalau diak semua pengundi di P199 Serian meseti ngundi BN ba Pengawa Bepilih Besai Ke-14GE14 ti deka datai ngambi tau dipeda nyadi penyukung tegap Najib.

    “Aku nemu kitai di P199 Serian bela betalatka atur mulaika kuasa bepelasarka MA63. Nyata dipeda Najib ukai semina nurutka pinta kitai tang iya chukup lantang di Serian.

    “Najib udah ngelawa Serian enam kali lalu tetiap kali penemuai nya, iya mai projek besai, sekeda nya benung digaga diatu.

    “Serian meseti malas pemaik Najib, kitai deka malas. Kitai deka nentuka P199 mengkang diempu BN nengah chara ke besai agi,’ku Riot seraya nerima tempik jari ari pengabang ke datai.

    Riot ngingatka bansa Bidayuh diak Najib udah ngasuh komuniti ke semina 200,000 nya berasai temegah pengudah iya (Riot) diangkat nyadi Menteri Penguasa Pemayuh Pengereja Pengawa tiga taun ke udah.

    “Kitai semua nemu, Bidayuh semina ngarika 1 peratus ari penyampau 33 juta peranak Malaysia.

    “Ngangkatka aku, seiku Bidayuh nyadi menteri penuh ba kabinet, iya mandangka basa ungkup komuniti kitai ke mit tu,’ku Riot.

    Ungkup pengundi di Serian, Riot meri terima kasih ke alai ketegal sukung sida ba enam pengawa bepilih ke udah, P199 dikelala PM.

    “Udah nyata, Najib rinduka pengundi di Serian. Aku pechaya enti kitai menang besai di Serian baka ke ba enam pengawa bepilih ke udah, Serian mengkang bisi ungkup sekali agi ba perintah baru ti deka ditumbuh pengudah GE14.

    “Aku minta kita semua ngundi BN, pemansang ke besai deka nganti kitai,’ku iya.

    Ba pengerami nya Riot ngagihka geran MRP ngagai JKKK Muara Ahi ba penyampau RM15,000 ti betuaika KK Sylvester Bong.

    Tim Premier Dance enggau Tim Lion Dance Serian bela nerima RM10,000 ari Riot.

    Bela datai di Tebedu Raymond Achen, SAO Wee Chung Wee, Temenggong Jee Ah Chok enggau Pemanca Chai Min Lee. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads