Header Ads

  • Berita Tebaru

    RM10.5j dikena ngemanah sekula rusak ketegal ampuh bah

    NGABAS PENUSAH RAYAT: Abang Johari berandau siku pengenduh ba palan ngenduh sementara lebuh ke ngabas sida ke tasah ampuh bah ba palan nya bedau lama udah.
    Sepenyampau 173 buah sekula di serata nengeri udah rusak ketegal penusah ampuh bah ke baru nyadi bedau lama tu tadi.

    BINTULU: Perintah nengeri ngagihka belanja penyampau RM10.5 juta dikena ngemanahka 173 buah sekula di serata nengeri ti udah rusak ketegal penusah ampuh bah ke baru nyadi tu tadi.

    Sepenyampau RM250,000 mega udah dikemendar dikena ngemanahka dua buah klinik, iya nya Klinik Nanga Tau enggau Klinik Nanga Sangan di Tatau, Bintulu.

    Pekara tu udah dibantaika Kepala Menteri Datuk Patinggi Abang Johari Tun Openg ba aum pengarang berita pengudah iya ngabas sida ti tasah ampuh bah, ditu, ke alai mega iya bisi nyuaka bantu.

    Kenyau ari minggu nyin tadi, bisi 489 iku sida tasah ari 113 ruang bilik udah diau ngenduh ba palan ngenduh pengudah rumah sida ampuh bah.

    Abang Johari madahka gaya penusah ampuh bah ke baru nyadi endang ke pemadu balat pengudah 55 taun, lalu meri tabi puji ngagai bala komiti mutarka penusah ngenyit nengeri, betuaika Sapit Kepala Menteri Datu Amar Douglas Uggah Embas enggau ejensi ke bukai, ba penyikar sida mindahka sida ti tasah ampuh bah.

    “Aku meri terima kasih ngagai Komiti Mutarka Penusah Ngenyit Nengeri ari baruh pegai Uggah enggau ejensi bekaul bukai ba penyikar enggau pemanah pengawa sida mantu raban ti tasah ampuh bah,” ku Kepala Menteri.

    Rambau penusah ampuh bah ke baru nyadi, pelilih Selangau di Sibu ngembuan sekula ke pemadu mayuh kena ampuh bah (40), ditangkan Mukah enggau Limbang (bela 28), Miri enggau Bintulu (22), Serian (9), Sarikei (3) lalu Betong enggau Kapit (bela 2).

    Pia mega ku kepala menteri, iya udah ngerah Opis Residen enggau Opis Tanah enggau Survei ngiga palan tinggi agi endur mindahka baru lima buah sekula di nengeri tu ti dalam kandang endur ke  suah ampuh bah, seraya nambah, palan baru tu mega meseti semak ke pengelantang apai indai nganjung bala anak sida ngagai sekula.

    Nitih ku iya, belanja dikena mindah baru lima buah sekula disengkaum dalam agih belanja RM10.5 juta nya.

    Uggah, Menteri Bekal Ai enggau Elekterik Menua Pesisir Dato Sri Dr Stephen Rundi Utom enggau Menteri di Opis Menteri Besai Datuk Joseph Entulu Belaun sama bela bisi datai. #UtusanBorneo

    No comments

    Post Top Ad