Sarawak dipilih nyadi tuai rumah AAAP 2018 kena 1 ngagai 5 Ogos - Berita Iban Online

Header Ads

  • Baru Nyadi

    Sarawak dipilih nyadi tuai rumah AAAP 2018 kena 1 ngagai 5 Ogos

    Prof Dr. Loh Teck Chwen
    KUCHING: Sarawak dipilih nyadi tuai rumah 18th Asian Australasian Animal Production Congress 2018 (AAAP2018) kena 1 ngagai 5 Ogos tu ila ba BCCK, ditu.

    Vice President Malaysian Society of Animal Production, Prof Dr. Loh Teck Chwen ngarapka kongres nya ila deka narit ati sereta nerima sukung ke chukup manah ari pengemeran industri produk jelu nengeri tu.

    Nitihku iya keterubah kongres tu diatur di Malaysia iya nya ba taun 1980, pengudah ti kala diatur ba mayuh bengkah menua baka Taiwan, Korea, New Zealand, Australia, Thailand, Filipina, India enggau Jepun.

    Ku iya, keterubah diatur ba Malaysia dalam taun 1980, kongres nya dipasuk 850 iku pesereta lalu kongres ke penudi diatur di Fukuoka, Jepun bisi urung 1,500 iku pesereta datai sereta ti pemadu mayuh dalam rikod kongres nya.

    “Taun tu ba Malaysia iya nya di Kuching, Sarawak juluk kitai deka ngempuru urung 1,000 iku pesereta lalu kitai arap bendar kongres tu deka meri penguntung ngagai pengawa bedagang produk jelu, kaban saintis, kaban teknologi,orang betupi jelu, kaban akademik, nembiak sereta ngagai sida ti sekalika bekaul terus tauka enda dalam industri ngasilka produk jelu ti nyengkaum ari menua tu empu enggau ari menua tasik.

    “Lalu kebuah kami ke milih Sarawak laban kami deka bekunsi enggau meri kelala penemu teknologi baru ngagai orang ti betupi tauka industri awakka ulih ngangkatka pemanah industri betupi enggau industri ngeluarka pemakai di Sarawak,” ku iya ke nyadi chairman pengatur AAAP 2018.

    Loh mansutka pekara nya dalam aum pengarang berita AAAP 2018 ke diatur ba BCCK ditu, lemai kemari, ti bisi digulu Menteri Muda Betanam Betupi Dr. Abdul Rahman Ismail.

    Kongres AAAP 2018 nya diatur Malaysian Society of Animal Production (MSAP) lalu program ke diatur nya nyerangkung aum besai, pengawa pemandang, bengkel enggau pengawa nemuai pengudah tembu aum besai.

    Berebak enggau tu Loh madahka maya kongres nya ila deka berandauka topik baka pemakai jelu enggau pengelikun tauka pemanah pemakai, utai tupi enggau ubah gaya hari, genetik, bioteknologi enggau ke bukai.

    Kongres nya mega dikearapka mantu industri dagang temuai nengeri berindik ari ti bisi nganggauka pesereta ari menua tasik datai ke Sarawak ke nyendiaka mayuh penyelai, nyengkaum pemakai baka kolo mee enggau laksa Sarawak, seni enggau barang pengelandik jari, jelu ke dilindung ba Taman Negara enggau penyelai ke bukai.

    Sukung ari perintah nengah opis menteri betanam betupi moden, tanah adat enggau pemansang kandang menua, opis menteri betanam betupi enggau ke bukai, kongres nya disadang mujur diatur.

    Entara speaker ke diambi ba aum besai iya nya Associate Professor Biometry, Universiti Sydney ti bejakuka pasal ‘The digital future: the role of ‘big data’ for agricultural development in the region’ enggau Taiwan’s National Pingtung University of Science and Technology, Professor Hsia Lang Zhou ti bejakuka ‘From practical monogastric animal management to greenhouse gas production’ kelimpah ari bisi speaker ari Malaysia, Filipina enggau Korea.

    Orang ke bisi ati deka enggau ngulu kongres AAAP 2018 dipinta ngerejista diri enda laun ari 30 April 2018.

    Penerang silik bekaul enggau kongres tu tau dipeda ba www.aaap2018.com tauka email ngagai fifi@placeborneo.com. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads