Sarawak fokus nyendiaka Jurulatih - Berita Iban Online

Header Ads

  • Baru Nyadi

    Sarawak fokus nyendiaka Jurulatih

    Datuk Patinggi Abang Johari Tun Openg
    Ngambika ulih nempa pemain, atlit ti tau ngangkatka nama nengeri enggau menua ngagai renggat ke tinggi, ku KM

    KUCHING: Perintah nengeri deka mekuh ngagai pengawa nyendiaka jurulatih dikena ngiga sereta nempa pemain ke ulih ngangkatka nama nengeri enggau menua ngagai renggat ke tinggi.

    Kepala Menteri, Datuk Patinggi Abang Johari Tun Openg madah, perintah nengeri deka nyendiaka kereban sereta penemu ngagai jurulatih nyengkaum nengah seminar.

    Menua kitai ku iya, bisi atlit ke udah nyulut sereta ulih dilatih nyadi jurulatih baka Azizul Awang, Nauraj Singh Randhawa, Farah Ann, Khairul Hafiz Jantan nyengkaum peranak Sarawak baka Welson Sim,Pandalela enggau Heidi Gan.

    “Nya alai aku pechaya amat, jurulatih ti baka nya ke patut dikemeratka kitai. Kitai patut nyendiaka sida kereban enggau penemu ke diguna awakka sida ulih ngiga nembiak baru ke landik jemah ila.

    “Lalu seminar tu peluang ke pemadu manah ngagai jurulatih ngulihka penemu enggau naka pemayuh ke ulih, nempa kaul enggau speaker kelimpah ari sida empu patut nyikap diri ngena sekeda pengelandik  baru ke dikemeranka ninting hari.

    Abang Johari mansutka pekara nya nengah teks jaku iya ti dibacha Menteri Dagang Temuai, Seni, Main Asal, Nembiak sereta Lumba enggau Main Datuk Abdul Karim Rahman Hamzah maya bejadika 5th International Seminar On Sports and Exercise Psychology 2018 (5thISSEP2018) ke diatur ba sebuah hotel ditu, kemari.

    Seminar antarabansa nya diatur perintah nengeri begulai enggau IPG Kampus Tun Abdul Razak (IPGTAR), UiTM sereta Sarawak Sports Corporation (SSC) enggau kerejasama ari Universiti Sains Malaysia (USM) enggau Universiti Malaya (UM).

    Seminar dua hari (kemari enggau sehari tu) nya digulu tebal agi peranak Sarawak sereta speaker ke dikangau nyengkaum ari menua Korea Selatan, Taiwan, Hongkong, Jepun, Thailand kelimpah speaker ari Malaysia.

    Siti ari objektif besai kitai ngatur seminar tu dikena nemu ulah deka bejalaika pengawa mansik ba raban jurulatih, ku iya.

    Kelimpah ari nya dalam aum pengarang berita, lebuh ke ngenang pasal seminar nya Karim madahka seminar nya dipejalaika begulai entara ejensi perintah enggau unit ti bekaul enggau pengawa nyendiaka bidang sains lumba enggau main, dikena nyapai juluk nempa mayuh jurulatih ti bepengelandik di menua tu.

    Iya arap bendar Sarawak udah nempa sekeda nama ke dilatih ari pun nyentuk ke nyulut ba renggat menua enggau antarabansa, ke ulih dilatih nyadi jurulatih lalu ngarika Malaysia jemah ila.

    “Tu seminar antarabansa tang tebal agi pesereta ari Sarawak, tu mega chara kitai ti deka bebendar nentuka Sarawak ulih nyadi sebuah nengeri lumba enggau main ti bekuasa jemah ila.

    “Bekaul enggau program tu, kitai enda ngetu naka tu aja tang kitai deka suah ngatur seminar ke baka tu dikena ngangkatka kualiti jurulatih kelimpah ari kitai ulih ngelawa serata nengeri tu lalu berengkah ngelatih atlit ke bisi pengulih, ngambika sida baka emas seruran dikendas seruran tampak sereta menyeling,” ku iya.

    Sama bisi datai ba pengerami nya kemari Menteri Muda Nembiak sereta Lumba enggau Main Datuk Snowdan Lawan, Direktor IPTAR Hamsiah Abdullah Masni; Ketuai Pemesai  Eksekutif Officer SSC Dr. Ong Kong Swee enggau Sapit Rektor Pekara Pelajar UiTM Sarawak Prof Madya Wan Akil Tuanku Abdullah. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads