Header Ads

  • Berita Tebaru

    Sarawak nagit nyapai 50% SLL ungkup dagin chapi manggai ba taun 2030

    Dr. Abdul Rahman Ismail
    KUCHING: Formula pelin besai dikena ngangkatka ‘Tahap Kecukupan Diri’ (SSL) ungkup dagin chapi ari 10 peratus ke diatu ngagai 50 peratus lebuh manggai 2030, benung dilangkar.

    Menteri Muda Betanam Betupi Dr. Abdul Rahman Ismail madah, 18th Asian Australasian Animal Production Congress 2018 (AAAP 2018) ke deka diatur bulan Ogos tu ila setipak bendar diatur sereta dikearapka ulih mantu nyapai juluk SSL nya.

    “Juluk kitai Sarawak ba SSL ungkup produk dagin chapi iya nya deka nyapai 50 peratus lebuh manggai taun 2030, diatu kitai semina 10 peratus aja. Kitai benung ngelangkar formula pelin besai ungkup SSL tu.

    “Nya alai AAAP 2018 ke diatur ba nengeri kitai setipak bendar enggau juluk Sarawak.

    “Laban tuju kongres tu iya nya ngiga strategi ke ulih mantu orang betanam betupi mit enggau jelan pemesai ngena teknologi moden ngambi ulih ngangkatka produk industri betupi di rantau tu sereta nyaup ngagai peminta sekuriti enggau pengelikun  pemakai ,” ku iya.

    Dr. Abdul Rahman mansutka pekara nya dalam aum pengarang berita AAAP 2018 ke diatur ba BCCK ditu, kemari.

    Sama bisi dalam aum pengarang berita nya kemari, Vice President Malaysian Society of Animal Production and Organizing Chairman 18th AAAP 2019, Prof Dr. Loh Teck Chwen, Pemangku Opis Servis Veterinar Sarawak, Dr Adrian Susin Ambud enggau ke bukai.

    “Tuju mega ngambika kitai nemu nama ke patut dikena ngangkat enggau ngemanahka industri produk jelu enggau industri betanam betupi kitai, setipak enggau juluk kepala menteri ti mai tranformasyen ngagai sektor betanam betupi Sarawak ngambika ulih nyadi penyual produk enggau pengasil ti bekualiti tinggi,” ku iya.

    Kongres nya mega ukai semina meri penguntung ngagai orang dagang ke endang udah gawa dalam beberapa bidang ngasilka produk jelu,tang mega ulih mantu kaban akademik enggau nembiak nambahka penemu sereta mantu nyadi orang keterubah ke jemah ila ngena teknologi baru dalam industri produk jelu di Sarawak.

    Sebedau tu Sapit Kepala Menteri ti mega Menteri Betanam Betupi Moden, Tanah Adat enggau Pemansang Kandang Menua, Datuk Amar Douglas Uggah Embas kala nyebut opis menteri iya nengah Opis Servis Veterinar bisi juluk deka nambahka SSL dagin chapi ari 10 peratus ke diatu ngagai 50 peratus enggau kambin ari 15 peratus ngagai 25 peratus.

    Dikena nyapai juluk SSL nya, opis menteri ku menteri nya deka bejalaika beberapa inisiatif nengah Opis Servis Veterinar.

    Entara inisiatif ti dipejalaika iya nya ngena ‘Inseminasi Buatan’ (AI) nambahka pemayuh anak chapi ungkup ‘ruminansia’  iya nya chapi, kerebau enggau kambin, import chapi enggau kambin ari Australia enggau kerebau ari Sabah dikena nambahka stok anak jelu enggau ke bukai. #UtusanBorneo

    No comments

    Post Top Ad