Sarawak ulih nyadi nengeri maju sebedau taun 2030 - Berita Iban Online

Header Ads

  • Baru Nyadi

    Sarawak ulih nyadi nengeri maju sebedau taun 2030

    Abang Johari bejaku maya majlis perasmian Perhimpunan Agung PBB di BCCK, pagi tadi. #MuhammadRaisSanusi
    KUCHING: Sarawak dipelabaka ulih nyadi sebuah nengeri maju sebedau taun 2030 enti ngemeran, berat sereta nguasa teknologi baru dikena ngatur enggau ngemansangka nengeri.

    Kepala Menteri ti mega Presiden Parti Pesaka Bumiputera Bersatu (PBB), Datuk Patinggi Abang Johari Tun Openg madah, laban diatu polisi nengeri ngemeranka ekonomi digital, betanam betupi ngena chara teknologi, Sarawak Pay, LRT enggau ke bukai ti disadang ulih mantu nyadi menua maju.

    Kebuah pia ku iya, dikena nyapai komitmen tauka juluk nya endang begunaka teknologi baru.

    Nitih ku iya, juluk nengeri maju 2030 ditumbuhka Tun Pehin Sri Abdul Taib Mahmud lebuh ke nyadi presiden parti PBB suba, ti mandangka ketuai ke sebedau tu bisi juluk sereta patut dijapai ketuai rebak diatu.

    “Nya alai kitai ke diatu patut nuju pemansang 2030. Ba penemu aku, enti kitai bisi teknologi bisi penemu, aku arap bendar sebedau 2030 kitai udah nyadi nengeri maju.

    “Aku arap amat kitai ulih (nyadi nengeri maju sebedau 2030) laban chara kitai ngatur nengeri patut manah sereta kitai patut nambahka asil ngambika ulih ngemansangka mengeri enggau menua pesisir.

    “Diatu aku enggau kaban dalam kabinet deka ngiga baka ni deka nambahka penatai pemisi Nengeri Sarawak. Kitai bisi minyak, gis sereta ai tang kitai semina ngemataka aja lalu tu patut diubah laban kitai dekaka belanja dikena ngemansang sereta nambahka penatai pemisi nengeri,” ku iya seraya madahka udah bisi chara tang bedau deka madah dulu.

    Abang Johari mansutka pekara nya lebuh bejadika Gempuru Besai Pampang Indu enggau Nembiak Parti Pesaka Bumiputera Bersatu (PBB) Ke-14 berambaika jaku ‘Mentransformasi Sarawak Melalui Ekonomi Digital’, ti diatur ba BCCK ditu, kemari.

    Bejaku baru iya madahka rebak baru ti nyengkaum Pampang Indu enggau Nembiak  parti patut ulih berubah sereta beratka penemu enggau teknologi pemadu baru.

    Parti ku iya, ngembuan usul penatai ti tegap dalam PBB, lalu dalam sejarah parti seruran ngubah sereta ngemansangka nengeri Sarawak, ti berengkah ari jeman Apai Jugah, niang Tun Rahman enggau Apai Jabu ti muka institusyen ke meri peluang ngagai orang biak baka Yayasan Sarawak, lalu ari suku dagang nengah SEDC enggau ke bukai ti udah ditumbuhka.

    Iya madahka Sarawak jauh udah maju nyengkaum menua pesisir berindik ari kandang menua baka Samarahan, Kapit, Mukah, Betong udah dibuka sereta dikemansangka.

    “Menua pesisir kitai di nengeri tu udah berubah nengah polisi politik pemansang kitai, tu asil ari PBB sereta disukung bakih dalam komponen Barisan Nasional (BN).

    “Baka ke suah disebut maya baum pampang PBB, Pehin Sri Adenan udah meri inspirasyen ngagai kitai minta pulai baru hak Sarawak ke udah lenyau, lalu sehari tu kitai deka nerus sereta bebendar ngambi nya pulai dikena ngubah Nengeri Sarawak.

    “Nya kebuah aku bejakuka pasal nuju digital laban pengidup kitai udah berubah, nya alai parti kitai patut sama nitihka ubah ke benung nyadi. Deka tauka enggai kitai tetap ngemeranka digital, enti enda kitai tinggal dibelakang,” ku iya.

    Kelimpah ari nya Abang Johari mega madahka kabinet merambu deka ngemansangka Grid Ai Nengeri iya nya ari Selatan ke Utara Sarawak.

    Iya madahka penanggul nadai ai agi bisi nyadi di menua pesisir nengeri tu ke suah disebanaka maya kimpin.

    “Renggat keterubah dipelabaka begunaka belanja urung RM1 bilion, tang aku nganggarka Grid Ai Nengeri begunaka urung RM7 bilion ngagai RM8 bilion, ungkup peranak genturung pendiau enggau rumah panjai di menua pesisir,” ku iya.

    Sama bisi datai ngulu pengerami nya Sapit Kepala Menteri ti mega pemangku Sapit Presiden PBB Datuk Amar Douglas Uggah Embas enggau Datuk Amar Awang Tengah Ali Hasan enggau ke bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads