Header Ads

  • Berita Tebaru

    SEDA Malaysia deka ngatur ISES ke-4, 10 enggau 11 April

    Dato Sri Dr. Stephen Rundi
    KUCHING: ’Sustainable Energy Development Office’ (SEDA) Malaysia deka ngatur ‘4th International Sustainable Energy Summit’ (ISES) 2018 di Hotel Pullman ditu, berengkah ari 10 enggau 11 April tu ila.

    Pemungkal atur pengawa nya ke bekerejasama enggau Opis Menteri Kuasa, Teknologi Gadung enggau Ai (MEGTW) sereta Perintah Nengeri Sarawak nengah Opis Menteri Bekal Ai enggau Elekterik Menua Pesisir digaga di luar sitak Kuala Lumpur, udah beratika lebih 700 iku penyereta ari menua tu sereta menua luar deka enggau ngulu atur program tu.

    Menteri Utiliti, Dato Sri Dr. Stephen Rundi anak Utom madah atur pengawa nya ke ngena rambai jaku ‘Sustainable Energy: the Future is Here’, setipak enggau program nya laban beratika pemerat global ba agenda gaya mua hari sereta pemerat nyapai pemujur kuasa sereta pengelikun.

    Atur pengawa nya ila deka dipejadi Kepala Menteri Datuk Patinggi Abang Johari Tun Openg.

    “Menua Sarawak chunto ke engkeman dalam pengawa kuasa ke ulih dikena baru (renewable energy), kelebih agi enti kitai beratika lebih ari 70 peratus kuasa hidro dalam ‘electricity mix’ sereta ngena elekterik nya mayuh dikena di menua pesisir.

    “Ketegal nya, Sarawak ngipak nyadi tuai rumah ngatur program tu,” ku iya.

    Pengawa tiga hari nya bisi tiga ‘plenary’ sereta 10 woksyop ‘Deepdive’ (DDWs), lalu dalam timpuh nya mega, bisi di atur sesi netapka pengawa dagang dikena ngangkatka pengawa komersil.

    Ba pengawa nya mega deka mai pemeranak puku, penyedia teknologi, palan wang sereta ejensi perintah ngagai program netapka pengawa dagang nya.

    Kelimpah ari nya, Dr. Rundi nandu baru madahka bepelasarka perambu strategik Perintah Nengeri Sarawak dalam pekara bekaul sistem elekterik digital sereta trend global dalam pemujur kuasa, program tu ila deka meri kelala dua bengkah pekara baru iya nya ‘The Future Role of Blockchain in the Energy Market’ sereta ‘The Emergence of Energy Storage Systems’

    Rambau pengawa tu ila deka mai urung 76 iku speaker ari menua tu empu sereta ari menua luar (Jerman, USA, China, Brazil, Jepun, Netherland, Canada, Brussels, Philippines, Indonesia, Australia) enggau gerempung antarabansa baka UNESCAP, USAID, ACE, UNIDO, NREL enggau ADB.

    Sama bisi enggau ngulu aum media nya kemari, Menteri Muda Elekterik Menua Pesisir Dr. Abdul Rahman Junaidi, Sekretari Mendam Utiliti, Dato Ir. Alice Jawan, Ketuai Khidmat Pengurusan Utiliti, Pele Peter Tinggom enggau Ketuai Pegawai Eksekutif SEDA, Catherine Ridu. #UtusanBorneo

    No comments

    Post Top Ad