Header Ads

  • Berita Tebaru

    Siku agi lelaki kena penyakit rabies udah nadai ba HUS

    Sepital Besai Sarawak (HUS)
    KUCHING: Siku lelaki ti diperubat ketegal ditepan igi penyakit rabies udah nadai ba Sepital Besai Sarawak (HUS) ditu, kemari.

    Lelaki ke berumur 59 taun ari Jalai Batu Kawa-Matang nyadi orang ti ketujuh bebadi nyawa ketegal penyakit nya. Iya nadai urung pukul 4 lemai kemari.

    Siku agi orang ti kena kes keenam penyakit nya agi benung diperubat di HUS.

    Nitihka pemadah Komiti Ngemutarka Tasah Menua (JPBN), mansa dipadah kena rampit virus, pengudah peresa ke digaga ba makmal kena 26 Januari tu tadi mandangka pemutus nya positif.

    Lelaki dipadah bisi kena ketup ukui kena 27 November, lalu sebedau nya udah nganjung diri berubat ba klinik swasta ba hari ke sama.

    Taja pia, lelaki nya tadi nadai dianjung betuchuk vaksin ba sepital.

    Kena 25 Januari tu tadi, mansa dipasuk ngagai HUS, pengudah ditemu bisi tanda penyakit rabies baka nyadi kasar, sereta takut kena ai.

    Sebedau nya, lelaki nya dianjung ngagai sepital swasta sebedau iya dipasuk ngagai HUS.

    Ba lansa bukai, sida ke bempu jelu ke ditupi sida iya, kelebih agi ukui tau di ukum denda manggai enda lebih lebih ari RM5,000 tauka kena jil enda lebih ari tiga bulan tauka kededua nya sekali enti ditemu salah nengah Genteran tusun Ukum Seksyen 37(2) & (3) Ordinan Kesihatan Awam Veterinar 1999.

    Sekretariat JPBN Sarawak, nengah siti pemadah kemari, madahka nengah seksyen nya, nyadi siti penyalah enti nejuka jelu sida iya lepas tauka mai ukui sida iya pansut,kelebih agi ba sitak ke udah ditetapka bisi Rabies, enti nadai surat betulis ari Opis Veteriner Menua (JPVS).

    Opis JPVS mega seruran ngelalau semua ngambika sida iya nagang jelu ke ditupi sida begulai enggau jelu bukai, baik nya ke udah dituchuk vaksin tauka bedau begulai enggau jelu ke (terbiar) lalu beratika ulah jelu sida iya. #UtusanBorneo

    No comments

    Post Top Ad