Snowdan dipilih nyadi ketuai kontigen Sarawak SUKMA Ke-19 - Berita Iban Online

Header Ads

  • Baru Nyadi

    Snowdan dipilih nyadi ketuai kontigen Sarawak SUKMA Ke-19

    BEJADI: Karim malu tawak kelai bejadika 5thISSEP2018, seraya diperatika (ari kanan) Ong, Hamsiah, Snowdan enggau Akil.
    KUCHING: Menteri Muda Nembiak sereta Lumba enggau Main, Datuk Snowdan Lawan dipilih nyadi ketuai kontigen Sarawak ba Sukan Malaysia (SUKMA) Ke-19 ti diatur di Perak taun 2018 tu.

    Pekara nya dipadahka Menteri Dagang Temuai, Seni, Main Asal, Nembiak sereta Lumba enggau Main, Datuk Abdul Karim Rahman Hamzah dalam aum pengarang berita, kemari.

    “Kabinet nengeri maya baum kabinet sebedau tu udah setuju pengudah diterang enggau silik pasal pekara tu, dia Menteri Muda Nembiak sereta Lumba enggau Main Datuk Snowdan Lawan dipilih nyadi ketuai kontigen Sarawak dalam SUKMA Ke-19 ke deka diatur ba Perak taun tu,” ku iya madah ngagai raban pengarang berita.

    Dulu ari nya Karim bejadika 5th International Seminar on Sports and Exercise Psychology 2018 (5thISSEP2018) ngarika Kepala Menteri Datuk Patinggi Abang Johari Tun Openg ba sebuah hotel ditu.

    Seminar antarabansa nya diatur perintah nengeri begulai enggau IPG Kampus Tun Abdul Razak, Sarawak Sports Corporation (SSC) enggau UiTM nengah kerejasama ari Universiti Sains Malaysia (USM) enggau Universiti Malaya (UM).

    Ngenang pasal SUKMA Ke-19 nya, Karim arap bendar kontigen Sarawak ulih menang berindik ari ti udah lama nyikap diri dalam semua lumba enggau main ke dipekit maya SUKMA.

    Nitih ku iya, dikena napi sereta nyapai juluk Sarawak dalam SUKMA, perintah bisi nganjung atlit ke menua tasik, nyuwa endur belatih, nempa kerejasama enggau gym peribit endur belatih urung dua taun ke udah, sereta ngatur pekit baka pekit angkat berat ke urung 20 taun enda kala dipekitka.

    “Pengarap kitai ngagai kontigen Sarawak ngarapka ulih mujur dalam semua lumba enggau main ke diambi.

    “Kitai udah lama sedia sereta belatih dalam tetiap lumba enggau main ke diambi, aku enggau ketuai kontigen sereta Sarawak ngarapka kitai ulih nyadi champion SUKMA taun tu.

    “Ngelama tu kitai suah ba penuduk lumur dua lalu bedau kala nyadi champion dalam timpuh ke lama, ke penudi endar kitai nyadi champion iya nya dalam taun 1994, lebih 20 taun udah,” ku iya seraya madahka juluk Sarawak deka ngulihka  midul emas ba semua lumba enggau main ti dipekitka.

    Berebak enggau tu, lebuh ti ngenang pasal pekit sepak takraw, teakwando enggau angkat berat ke ditingkilka ari rintai besai lumba enggau main SUKMA Ke-19, iya madahka diri enda lantang ati enggau pemutus ke digaga sida ke bekaul.

    Kebuah pia ku iya, laban dua ari tiga ke ditingkilka nya dikearapka meri midul ngagai Sarawak, iya nya angkat berat enggau teakwando.

    “Kena 8 Februari tu Menteri Nembiak, Lumba enggau Main deka ngatur aum lalu nganggauka semua exco lumba enggau main di Malaysia nyengkaum menteri ke nyaga lumba enggau main. Lalu siti agi agenda aum nya bekaul enggau tiga lumba enggau main ti ditingkilka nya.

    “Kitai ngarapka tiga lumba enggau main nya ulih dipekitka baru laban nya semua lumba enggau main besai ke enda tau enda diatur.

    “Lalu aku nemu dua ari tiga ke ditingkilka nya amat semak enggau kitai ba pengawa kitai nyendiaka diri nyadi champion,” ku iya ti disempulang Snowdan dalam aum pengarang berita nya.

    Sama bisi datai Direktor IPTAR Hamsiah Abdullah Masni; Ketuai Pemesai Eksekutif SSC Dr. Ong Kong Swee enggau Sapit Rektor Pekara Pelajar UiTM Sarawak Prof Madya Wan Akil Tuanku Abdullah. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads